وفاقی وزیر ڈاکٹر مصدق ملک ءَ یو این او ڈی سی ءِ ملکی نمائندہ ءَ گوں گند ءُ نند

اسلام آباد۔22اکتوبر  (اے پی پی): موسمیاتی بدلی ءُ چاگردی رابطہ ءِ وفاقی وزیر ڈاکٹر مصدق ملک ءَ یو این او ڈی سی ءِ پاکستان ءِ ملکی نمائندہ ٹرولز ویسٹر ءَ گوں گند ءُ نند کت۔ چار شمبے ءِ روچ ءَ موسمیاتی بدلی ءُ چاگردی یکوئی ءِ وزارت ءِ نیمگ ءَ جاڑی بوتگیں بیان ءِ رد ءَ دیوان ءَ ناجائزیں الیکٹرانک کامرس، منی لانڈرنگ ءُ منظم ناجائزیں درچک ءِ کٹائی ءِ نیام ءَ گیش بوھوکیں یکے دومی ءِ سیادی ءُ ایشی ءِ چاگردی برجائی ءُ گورننس ءِ سر ءَ منفی اثر ءِ سر ءَ سرجمیں رنگ ءَ گپ ءُ تران کنگ بوتگ۔ فریقین ءَ اے گیش بوھوکیں رجحان ءِ سر ءَ سک باز جیڈھ ءِ درشانی کت کہ ایشی ءَ چہ نہ ایوک ءَ قدرتی وسیلگ آناں تاوان رسگ ءَ اِنت بلکیں پائیدار دیمروئی ءِ جھان ءِ مول ءُ مراد آنی سرجمی ءَ را ھم رکاوٹ جوڑ کنگ ءَ اِنت۔ وفاقی وزیر ڈاکٹر مصدق ملک ءَ اے گپ ءِ سر ءَ زور پر دات کہ پاکستان ءِ کانود ءُ پالیسی فریم ورک ءَ را گیش موثر ءُ سخت جوڑ کنگ بہ بیت تانکہ اے جرم آنی ھلاپ ءَ نفاذ ءِ میکانزم ءَ را مھکم کنگ بہ بیت۔ ٹرولز ویسٹر ءَ پیسر ءَ انڈونیشیا ءِ پروگرام آفس ءِ کنٹری منیجر ءُ میانمار ءِ کنٹری آفس ءِ پروگرام کوآرڈینیٹر ءِ بستار ءَ کار کتگ۔ آئی ءَ چاگردی جرم آنی ھلاپ ءَ پاکستان ءِ سنگینیں کوشست آناں ساڑات ءُ یونوڈ سی ءَ را اے رد ءَ سرجمیں رنگ ءَ کمک ءِ دل یکیمی دات۔ دوئیں نیمگ آنی نیمگ ءَ یکجائی منصوبگ ءِ جوڑ کنگ ءِ سر ءَ تپاک کنگ بوتگ کہ ایشی ءِ مول ءُ مراد ادارگ آنی نیام ءَ کمک ءَ را گہتر کنگ، کانود ءُ نفاذ ءِ نظام ءَ را نوک کنگ ءُ ناجائزیں کار آنی سر ءَ جوانیں رنگ ءَ گر ءُ دار کنگ اِنت کہ آ چاگرد ءُ معیشت ءِ سر ءَ نیگیٹیو اثر مند بنت۔