راجی شمولیت و ادارہ جاتی احتساب ءِ قومی شونداری ایجنڈانا بشخ جوڑ کننگ وخت انا اہم گرج ءِ، احسن اقبال

اسلام آباد۔ 22 اکتوبر (اے پی پی) بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ پاکستان اٹ پائیدار شونداری و گچین حکمرانی نا دارومدار داہیت آٹی ءِ کہ ہر شاری ءِ فیصلہ سازی نا عمل اٹ اوار کننگے۔ او اسلام آباد اٹی اڈ ہلوک ’’ آواز ٹو پروگرام ‘‘ نا بنائی سیشن آن تران کریکہ ہراٹی راجی شمولیت، ادارہ جاتی احتساب ، و السی بشخ ہلنگ نا مون آ دننگ آ سرجمی اٹ گپ وتران کننگا۔ احسن اقبال پارے کہ راجی شمولیت و ادارہ جاتی احتساب ءِ قومی شونداری ایجنڈا نا بشخ جوڑ کننگ وخت انا اہم گرج ءِ۔ اوپارے کہ اسہ ملک اس ہم ہمووخت اسکان حقی شونداری کننگ کپک ہراتم اسکان اونا پالیسی تیٹی الس نا توار اوار مف۔ اونا رداٹ، شفافیت و شمولیت پائیدار حکمرانی نا بنداو ءِ و حکومت پاکستان دا اصول آتے تینا اصلاحاتی پالیسی تا بشخ جوڑ کرینے۔ احسن اقبال پارے کہ پاکستان نا شونداری ٹی ہرشاری و ہرکمیونٹی نا کڑد المی ءِ۔ نن الس نا توار ءِ پالیسی سازی نا مرکز اٹ اتسا اسہ ہندن ءُ راج اسے نا بنداو ءِ تخنگ اُن ہراڑے شونداری بیرہ منہ تپہ آخا بلکن غٹ اکن مرے۔ بنجائی وزیر پارے کہ آواز IIپروگرام نزور تپہ، زالبول، ورنا و معذور بندغ آتے پالیسی عمل اٹ اوار کرسا اسہ پوسکن ءُ مثال اس قائم کرینے۔ اوداپروگرام ءِ شریداری طرز حکمرانی نا سرسہب درور گوندا، ہرانئے بیرہ راجی انصاف بلکن ادارہ جاتی شفافیت نا مون آ دننگ اٹ ہم اہم کڑد ادا کننگ ءِ۔ احسن اقبال پارے کہ حکومت ملک انا شونداری سفر کن ’’اڑان پاکستان‘‘ نا پن اٹ اسہ جوان ءُ فائیو ایزفریم ورک اس جوڑ کرینے، ہراتعلیم، برآمدات، چاگڑد، توانائی و راجی بریبری نا تمبہ غاتیا تالان ءِ۔ اوپارے کہ اڑان پاکستان نا مسخت ساڑی آ چیلنج آتے وارخواہی تیٹی بدل کرسا پاکستان ءِ سوگو ، پائیدار و پوسکن آ زرگزران جوڑ کننگ ءِ۔ برآمد آتیٹی ودکی، ڈیجیٹل زرگزران نا مون آدننگ، گرین انرجی، و چاگڑد دوست پالیسی تیا عملدرآمد ہندا وژن نا بشخ ءِ۔ احسن اقبال زورشاغا کہ ورناتےقومی شونداری نا عمل اٹ مرکزی کڑد تننگ حکومت نا اولیت ءِ۔