پاکستان و چین نا نیام اٹ متکن و سوگو شریداری برجاء، قومی ایئرلائن نا نجکاری سال انا ایسرآن مست پورو مننگ نا گمان ءِ، وزیرخزانہ محمد اورنگزیب نا سی جی ٹی این ءِ انٹرویو

واشنگٹن۔22اکتوبر (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ پاکستان و چین نا نیام اٹ متکن و سوگو شریداری برجاءِ، قومی ایئرلائن نا نجکاری سال انا ایسر آن مست پورو مننگ نا گمان ءِ۔ برجامالی سال اٹی شرح نمو کم و ود 3.5 درسد سلنگ نا گمان ءِ، امریکہ تون ٹیرف مذاکرات سرسہبی اٹ پورو مننگ آن پاکستانی ٹیکسٹائل خاص کر ہوم ٹیکسٹائل نا برآمد کنندگان تے نمان فائدہ مریک۔ اوداخیال آتا درشانی ءِ جہانی مالیاتی فنڈ (آئی ایم ایف ) و جہانی بینک انا سالانہ دیوان تا وخت آ واشنگٹن ڈی سی ٹی سی جی ٹی این امریکہ ءِ انٹرویو ترساکرے۔ وزیرخزانہ ملک انا زرگزرانی حالیت، اصلاحات نا پروگرام و آخبت نا اقتصادی لائحہ عمل نا بارواٹی سرجمی اٹ گپ وتران کرے۔ اوپارے کہ تدوک آ اسہ سال اٹی پاکستان زرگزرانی سوگوی نا بابت نمان پیش رفت کرے، مالی و پیشن نا کھاتہ غاتیٹی گچینی بس، روپئی نا قدر سوگو ئس، زرمبادلہ نا کوڑی دونیم تُو انا درآمد آتا بریبر مس و کبینی نا کچ اسہ ہندسی مسنے۔ اونا پاننگ ئس کہ پالیسی ریٹ اٹی نمان کمتی کننگانے وخت ا س کہ مسہ جہانی ریٹنگ ایجنسی فِچ، ایس اینڈ پی و موڈیز کم و ود مسہ سال آن پد پاکستان نا زرگزرانی درجہ بندی ٹی گچینی ظاہر کریر۔ وزیرخزانہ پارے کہ آئی ایم ایف نا ودکی مالیاتی پروگرام نا رداٹ ارٹ میکو جاچ رپورٹ پورو مسنے اوکان پد سٹاف کہول آ معاہدہ طے مس۔ اونا پاننگ ئس کہ آئی ایم ایف پاکستانی حکومت نا برجااصلاحاتی گام گیج آتیا پت انا درشانی ءِ کرے ہرافتے ٹی خراج نظام، توانائی نا بشخ، سرکاری ادارہ غاتا نجکاری و مالی نظم و ضبط نا بابت اصلاحات اوار ءُ۔ وزیرخزانہ نجکاری پروگرام نا بحالی نا ذکر ءِ کرساپارے کہ برجامالی سال اٹی اولیکو ٹرانزیکشن پورو مس ہرانا رداٹ اسہ نجی بینک ءِ متحدہ عرب امارات نا کمپنی ہلک، قومی ایئرلائن نا نجکاری ہم سال انا ایسر آن مست پورو مننگ نا گمان ءِ۔ سینیٹر محمد اورنگزیب پارے کہ گچین زرگزرانی بنداو نا سوب پاکستان اِراسال آن زیات وقفہ غان پد دُوارہ جہانی مالیاتی منڈی تسکان رسینگ دوئی کننگ اٹ سرسہب مس۔