توانائی نا گچین کھپت کن ماڑی تیٹی انسولیشن نا مون آدننگ المی ءِ، خصوصی کمکار صنعت وپیداوار نا چیئرمین این ٹی ڈی سی تون اوڑدہی ٹی گپ وتران

اسلام آباد۔ 22 اکتوبر (اے پی پی) وزیراعظم نا خصوصی کمکار صنعت و پیداوار ہارون اخترخان تون نیشنل ٹرانسمیشن اینڈ ڈسپیچ کمپنی(این ٹی ڈی سی) نا چیئرمین نا کماشی ٹی اسہ ڈل اس اوڑدہی کرے۔ وزارت صنعت و پیدوار نا کنڈآن جاری بیان نا رداٹ اوڑدہی ٹی صنعتی و ہڑدے ئی کاریم اٹ اتنگ کن توانائی نا گچین ماڈلز و پائیدار توانائی نا وڑوڈول آتیا حوال تننگا۔ چیئرمین این ٹی ڈی سی پارے کہ ماڑی تیٹی انسولیشن نا کاریم اٹ اتنگ آن توانائی نا خاطرخواہ بچت ممکن ءِ۔ اوپارے کہ انسولیشن نا کمک اٹ ماڑی تا درجہ حرارت درکار کچ آ برقرار تخنگ مریک ہراڑآن توانائی نا کھپت اٹی نمان کمتی بریک۔ چیئرمین نا رداٹ ہندا مسخت نا رداٹ توانائی کاریم اٹ اتنگ بلڈنگ کوڈ درستی راستی کرفنگانے، ہرافتیا بنجائی حکومت عملدرآمد نا بناءِ کرینے۔ خصوصی کمکار ہارون اخترخان پارے کہ پاکستان کن پوسکن آ ٹیکنالوجی و پائیدار توانائی نا مون آ دننگ وخت انااہم گرج ءِ۔ اوپارے کہ باسنی تیٹی صنعت و ہڑدے ئی زند اٹی توانائی نا طلب اٹی نمان ودکی مریک و داطلب ءِ پورو کننگ کن ماڑی تیٹی انسولیشن نا مون آ دننگ اسہ گچین و کم خڑچ ایسر اسے۔ اومستی پارے کہ ملک انا جم قومی پیداوار اٹی ودکی براہ راست توانائی نا خڑچ اتون وابستہ ءِ ہنداسوب آن علاقائی مسابقت کن صنعت آتیٹی پائیدار توانائی نا وڑوڈول تینا کننگ المی ءِ۔ ہارون اخترخان انجینئرنگ ڈویلپمنٹ بورڈ ءِ پارت کرے کہ او این ٹی ڈی سی تون اواری اٹ توانائی بچت نا بابت عملی گام گیج آتیا پیش رفت نا بارواٹی رپورٹ تیار کے۔ داوخت آلاہور یونیورسٹی آف مینجمنٹ سائنسز ناڈل خصوصی کمکار ہارون اخترخان ءِ ایشیاٹرانزٹ سمٹ 2025 اٹی بشخ ہلنگ نا سلہ ہم خلک۔