وزیراعظم شہباز شریف نا انسپائر انیشی ایٹیو نا بناءِ کننگ نا دود آن تران

اسلام آباد۔ 21 اکتوبر (اے پی پی) وزیراعظم محمد شہباز شریف سیمی کنڈکٹر پروگرام ءِ وخت انا اہم گرج گوندسا پارینے کہ دنیا ٹی سیمی کنڈکٹرز نا بابت بیانیہ نا جنگ برجاءِ، سیمی کنڈکٹرز و مصنوعی ذہانت آ عبور دوئی کروک آ قومک دنیا نا آخبت آ حکمرانی کیرہ، سیمی کنڈکٹر پاکستان نا آخبت و ورناچین نا ڈٹ ءِ، آئی ٹی، اے آئی و سیمی کنڈکٹر کون آ بشخ آتیٹی ورناتا تربیت المی ءِ، حکومت ڈٹ آتیکن پین وسیلہ ہم فراوان کیک۔ داخیال آتا درشانی ءِ او سے شنبے نادے آ داڑے پاکستان اٹ سیمی کنڈکٹر کن انسپائرانیشی ایٹیو نا بناءِ کننگ نا دود آن تران کرسا کرے۔ دود اٹی نائب وزیراعظم ووزیرخارجہ اسحاق ڈار ، بنجائی وزیر انفارمیشن ٹیکنالوجی شزا فاطمہ خواجہ، بنجائی وزیر ڈٹ بندی و شونداری احسن اقبال ، بنجائی وزیر حوالکاری و شینکاری عطاء اللہ تارڑ ، بنجائی وزیر واپار جام کمال خان ، بنجائی وزیر سائنس و ٹیکنالوجی خالد مگسی، وزیراعظم یوتھ پروگرام نا چیئرمین رانا مشہود احمد خان، پنی آ چاہندار ٹیکنالوجی ڈاکٹر نوید شیروانی، بڑزکو سرکاری کمامدار، ٹیکنالوجی چاہندار، اہل علم و طالب علم آک بشخ ہلکر۔ وزیراعظم پارے کہ سیمی کنڈکٹر پروگرام وخت انا بے کچ اہم انگا گرج و اسہ تاریخی ءُ گام اسے، دانا تیاری ٹی بشخ ہلوک آ غٹ بندغ آتا کڑد ستاکڑزک، دنیا ٹی سیمی کنڈکٹر نا بابت بیانیہ نا جنگ برجاءِ، اللہ تعالیٰ پاکستان ءِ قدرتی وسیلہ تسنے، ننا زمواری ءِ کہ وسیلہ غاتیان پبی فائدہ ہرفر و قوم ءِ اوڑآن معلومدار کیر۔ اوپارے کہ سیمی کنڈکٹر پاکستان نا آخبت و ورناچین نا ڈٹ ءِ ، سیمی کنڈکٹر ز و مصنوعی ذہانت آ عبور دوئی کروک آ قومک دنیانا آخبت آ حکمرانی کیرہ، سرکاری بشخ انا شونداری پروگرام اٹی داڈ ٹ آتیکن 4.5 ارب روپئی تخنگانے، دااسہ بناءِ، حکومت ڈٹ آتیکن پین وسیلہ ہم فراوان کیک۔ وزیراعظم پارے کہ ورناچین اکن ایلو ہم چندی پروگرام تیا عمل مننگ ءِ، پاکستان ڈیجیٹل اتھارٹی اس جوڑ مسنے، ایف بی آر ءِ 100 درسد ڈیجیٹائز کننگ انگ ءِ، حکومت ڈیجیٹل پاکستان وژن نا رداٹ چندی ڈٹ آتا بناءِ کرینے، ایف بی آر ڈیجیٹائزیشن ، کیش لیس اکانومی، ڈیجیٹل والٹس اہم ڈٹ آتیٹی اوار ءُ، ایلو ملک آک ہم پاکستان اٹ بناکروک آ پروگرام تا ستاءِ کرینو۔ وزیراعظم پارے کہ روچہ مبارک اٹی حقدار بندغ آتیکن 20 ارب روپئی جتا کننگاسس، یوٹیلیٹی اسٹور آتیٹی بھلو کچ اسے آ کرپشن ئس، لین لگاکہ، دادے مدامی کن بند کننگانے، نن اونا جاگہ غا روچہ ٹی ڈیجیٹل والٹس نا کمک اٹ 20 ارب روپئی حقدار آتے براہ راست مون تسن، ڈیجیٹل والٹس ملک انا تاریخ اٹی تینا نوعیت نا اولیکو آزموندہ ئس، بروک آ سال دادے پین ودفنگک، حکومت پاکستان نا ڈیجیٹل وژن ءِ مون آدینہ۔ وزیراعظم پارے کہ ورناک ننا میرات و غٹ آن نہادی سرمایہ ءُ، آئی ٹی ، اے آئی و سیمی کنڈکٹرز کون آ بشخ آتیٹی ورناتا تربیت المی ءِ، اوفتے اخس کہ تربیت ترفنگ کرین ترفنہ، دا بشخ اٹی بھاز کچ ارے، ننے داسہ داڑکن پبی کاریم کروئی مریک۔ بنجائی وزیر انفارمیشن ٹیکنالوجی فاطمہ خواجہ پارے کہ اینو اسہ تاریخی ءُ دے اسے ، پاکستان اٹی اولیکو وار نیشنل سیمی کنڈکٹر پروگرام نا بناءِ کننگانے، وزیراعظم نا کماشی ٹی نیشنل سیمی کنڈکٹر پروگرام نا بناتاریخی ءُ مزل نا نشان اسے، پروگرام وزیراعظم نا وژن ڈیجیٹائیزیشن پاکستان نا رداٹ اہم پیش رفت اسے۔ پروگرام ٹیکنالوجی ڈٹ ہی آخا بلکن خودانحصاری و زرگزرانی وتواجہی نا بنداو ءِ، ڈٹ آتا پد اٹ دے ونن نا خواری چندی ٹیمک و چاہندار آتا کوشست اوار ءِ، وزیراعظم نا کماشی ٹی ڈیجیٹل وژن و ورناتیا پت داتغ ءِ حقیقت اٹ بدل کرینے، فیلڈ مارشل سید عاصم منیر و ایس آئی ایف سی نا ٹیم ہم داٹی بھاز اہم کڑد ادا کرینو۔ ڈٹ انا رداٹ 7200 ورناتے پوسکن آ ٹیکنالوجی ٹی تربیت فراوان کننگک، دا پنچ سا ل انا ڈٹ ءِ ڈٹ انا رداٹ 9 یونیورسٹی تا کلسٹرز جوڑ کننگک و 6 پوسکن آ انٹیگریٹڈ سرکٹ نا لیبارٹریز تیار کننگک۔ اوپارے کہ وزیراعظم نا کماشی، پت و سرپرستی نا نتیجہ ءِ کہ اینو نن پوسکن آ دور اٹی پترینگ انگ اُن، نن ناممکن ءِ ممکن کرسا نشان ایتنہ و پاکستان تینا نت تیا سلک۔ ڈاکٹر نوید شیروانی پارے کہ سیمی کنڈکٹر ز آخبت اٹ ڈیٹانا رکھ اٹی اہم حیثیت نا حامل مریک، پاکستان نیشنل سیمی کنڈکٹر پلان اٹ داڈٹ ءِ اوار کننگانے، کنے خوشی ءِ کہ نن اولیکو گام ءِ ہرفینن، سائبر سیکورٹی و سیمی کنڈکٹر آن بیدس شونداری نا عمل مون آ چلینگ انگ کپک۔ سیمی کنڈکٹر انڈسٹری آ کاریم کننگ نا گرج ءِ۔ پاکستان و سعودی عرب ہم داچرجوئی ٹی اسہ ایلو تون کمک کیرہ، دا بشخ اٹی ننے خودکفالت دوئی کروئی مریک داکان بیدس ننکن پین چارہ اف۔ داکان مست وزیراعظم محمد شہباز شریف نیشنل سیمی کنڈکٹر پروگرام نا باضابطہ بناءِ کرے۔ سیمی کنڈکٹر پروگرام آ وزارت انفارمیشن ٹیکنالوجی و ٹیلی کمیونکیشن نا کماشی و پاکستان سافٹ ویئر ایکسپورٹ بورڈ انا کمک اٹ عمل کننگ انگ ءِ ہرانا کمک اٹ پاکستان باضابطہ وڑاٹ جہانی سیمی کنڈکٹر صنعت اٹی پترینگانے ہرانا کچ دا وخت آ 600 ارب ڈالر آن زیات مالیت نا ءِ  و 2030 ء اسکان دا اسہ ٹریلین ڈالر آن گدرینگ انگ نا گمان ءِ۔