بنجائی وزیر جنید انوار چوہدری تون خصوصی کمکار صنعت وپیداوار ہارون اختر خان نا اوڑدہی

اسلام آباد۔ 21 اکتوبر (اے پی پی) وزیراعظم نا خصوصی کمکار صنعت و پیداوار ہارون اختر خان بنجائی وزیر بحری امور جنید انوار چوہدری تون اوڑدہی کرے ہراٹی پاکستان اسٹیل ملز انا بحالی و بحری و صنعتی بشخ انا انظام آ تالان پوسکن آ ڈٹ ’’سی ٹو اسٹیل گرین میری ٹائم انڈسٹریل کوریڈور‘‘ آ سرجمی اٹ گپ وتران کننگا۔ بنجائی وزیر بحری امور جنید انوار چوہدری داوخت آ پورٹ قاسم اٹی اولیکو ’’سی ٹو اسٹیل گرین انڈسٹریل کوریڈور ‘‘ اس جوڑ کننگ نا پڑو کرے۔ اوپارے کہ دا ڈٹ بروک آ دہ سال آتیٹی کم و ود 13ارب ڈالر نا بچت نا ذریعہ جوڑمریک۔ جنید انوار چوہدری پارے کہ دا ڈٹ بحری و صنعتی بشخ آتے پوسکن آ ٹیکنالوجی تون ہم گرنچ کیک وخت ا س  کہ پاکستان اسٹیل ملز ءِ اسہ پوسکن اسٹیل پراسیسنگ و شپ ری سائیکلنگ و ریپیئر کمپلیکس تون گنڈنگک، دا گام آن زرمبادلہ نا کوڑی تیٹی بچت تون اوار اوار ہندی صنعت نا مون آ دننگ و روزگار نا گیشتر وارخواہی ودی مریک ۔ بنجائی وزیرپارے کہ سی ٹو اسٹیل کوریڈور پاکستان نا صنعتی پنجر اٹی پائیدار شونداری، چاگڑدی رکھ و تکنیکی خودکفالت نا پوسکن آ بشخ انا بناجوڑمریک۔ خصوصی کمکار ہارون اخترخان وزارت بحری امور نا سلاہ ءِ قابل عمل و دوررس اثرآتا حامل گوندساپارے کہ حکومت دا ڈٹ آ تعلقدار وزارت آتا تین پہ تینی شریداری آن دمدستی عملدرآمد ءِ پک کیک۔ اومستی پارے کہ صنعتی و بحری بشخ آتا سوگو شونداری آن زرکاری، برآمدات و ہندی پیدوار اٹی نمان ودکی مریک  ہرا ملکی زرگزران ءِ پائیدار بنداوتیا سوگوی فراوان کیک۔