یک جان ءِ رکّینگ سرجمیں انسانیت ءِ رکّینگ ءِ برابر اِنت، مئے ریسکیو کار ہمک روچ بازیں جان ءِ رکّینگ ءَ کن اَنت، وفاقی وزیر پروفیسر احسن اقبال ءَ نیشنل ریسکیو چیلنج ءَ گوں تران

لاہور۔20اکتوبر  (اے پی پی): منصوبگ بندی، دیمروئی ءُ اصلاحات ءِ وفاقی وزیر پروفیسر احسن اقبال ءَ گشتگ کہ یک جان ءِ رکّینگ سرجمیں انسانیت ءِ رکّینگ ءِ برابر اِنت، مئے ریسکیو کار اصل ءَ ہمک روچ بازیں جان ءِ رکّینگ ءَ انسانیت ءَ را رکّینگ ءَ اَنت۔ آئی ءَ اے ھیالانی درشانی دو شمبے ءِ روچ ءَ تھوکر نیاز بیگ ءَ ایمرجنسی سروسز اکیڈمی ءَ برجم داشتگیں نیشنل ریسکیو چیلنج 2025ءَ گشتانک دیان ءَ کت۔ وفاقی وزیر ءَ گوشت کہ 2008 ءَ وھدے آئی ءِ سر ءَ اُرش کنگ بوت گڈا ریسکیو 1122 ءِ کارندہ آناں وھد ءِ سر ءَ ہسپتال ءَ سر کت۔ آئی ءَ گوشت کہ پنجاب ءَ سیلاب چہ نارووال ءَ بندات بوتگ ءُ ریسکیو کارندہ آں ھزاراں مردم وھد ءِ سر ءَ ایر کتگ ءُ ایمنیں جاھاں سر کتگ انت۔ آئی ءَ گوشت کہ آیوکیں نیشنل ریسکیو چیلنج ءَ زالبول آنی گیش ءَ چہ گیش بھر زوری گندگ لوٹ ایت۔ ھرچے گیشتر جنین آدم ریسکیو سروس ءِ بھر جوڑ بہ بنت، جنین آدمانی واستہ ریسکیو کنگ آسان تر بیت پرچا کہ جنین آدم چہ مردین آدماں ھچ وڑیں پڑ ءَ کمتر نہ بنت۔ آئی ءَ گوشت کہ 1998ءَ وھدے مزن وزیر محمد نواز شریف ءَ ایٹمی تراک کتگ گڈا ڈاکٹر عبدالقادیر خان یک ھاسیں منصوبگ ءِ ھوالگ ءَ آئی ءِ گور ءَ اتکگ ات۔ من جست کت کہ وھدے ما ایٹمی توان زرتگ گڑا ھچ ملک مئے ھمراہ نہ بوتگ، کس ءَ کمک نہ داتگ گڑا تو اے سوبمندی چون رستگ؟ کامیابی ءِ فارمولہ کہ ڈاکٹر عبدالقدیر خان ءَ من ءَ گشتگ ات ہما فارمولہ انت کہ من ریسکیو آرگنائزیشن ءَ گنداں، کہ آرگنائزیشن ءِ ہمک مردم سیکورٹی گارڈ بہ بیت یا ڈرائیور وت ءَ یک مشن ءِ بہمکے لیک اتگ ات۔ وفاقی وزیر احسن اقبال ءَ گوشت کہ ریسکیو 1122 ءِ سوبمندی ءِ تہ ءَ ڈاکٹر رزوان نصیر ءِ وڑیں باصلاحیتیں سروکی ءِ ازمت ستا کرز اَنت۔ آئی ءَ گیش کرتگ کہ وھدے انوگیں سرکار ءَ اقتدار گپتگ گڑا معیشت ھراب بوتگ ءُ مردم گشگ ءَ اتنت کہ پاکستان دیوالیہ بوھگ ءَ انت بلے مزن وزیر محمد شہباز شریف ءِ سروکی ءَ ما نہ ایوک ءَ معیشت ءَ را دیوالیہ بوھگ ءَ چہ رکینتگ بلکیں من آئی ءَ را دیمروئی ءِ راہ ءَ ایر کتگ کہ اے یک مثالی سوبمندی یے ۔ منصوبگ بندی ءِ وفاقی وزیر احسن اقبال ءَ گوشت کہ راستی ءِ جنگ ءَ چہ پد دیمروئی ءِ جنگ ءِ واستہ ھرکس ءَ را یکجائی کرد پیلو کنگی اِنت۔ مرچی سرجمیں دگنیا ءَ پاکستان ءِ معیشت بحال کنگ ءِ گپ بیگ ءَ اِنت۔ آئی ءَ گوشت کہ سلاہ بندیں اُرد ءَ بھارتی زوراکی ءِ سر ءَ جوانیں پسو دات، ءُ مزن وزیر محمد شہباز شریف ءُ فیلڈ مارشل جنرل عاصم منیر ءِ جوانیں حکمت عملی ءَ گوں راستی ءِ جنگ ءَ مزنیں سوبمندی یے رست۔ احسن اقبال ءَ گوشت کہ مارا وتی شھید آنی سر ءَ پھر انت، ناشرکاری ءِ ھلاپ ءَ جنگ ءَ سلاہ بندیں اُرد ءَ بے کساس قربانی داتگ۔ منصوبہ بندی ءِ وفاقی وزیر ءَ گوشت کہ ما ورنا آنی وشھالی ءُ وشھالی ءِ واستہ کوشست کنگ ءَ ایں، ملک انتہا پسندی ءُ کرپشن ءِ برداشت ءَ نہ کنت۔ ناشرکاری ءِ ھلاپ ءَ جنگ ءَ سلاہ بندیں اُرد ءِ قربانی آناں شگر ءُ منت پیش کنان ءَ گوشت کہ راج ءَ را وتی شہید آنی سر ءَ پھر انت ۔ احسن اقبال ءَ گوشت کہ حکومت مزن وزیر ءِ سروکی ءَ اقتصادی دیمروئی ءُ وشھالی ءِ واستہ سرجمیں کوشست ءَ کنگ ءَ انت۔ وفاقی وزیر ءَ گوشت کہ اودان پاکستان ءِ وژن ورنا آناں گیش ءَ چہ گیش وانگ ءُ زانگ ءُ روزگار ءِ موہ پجاری کنگ انت۔ دانکہ ملک ءِ دیمروی ءِ تہا ورنا آنی کرد ءَ را گیش موثر جوڑ کنگ بہ بیت۔ پروفیسر احسن اقبال ءَ گوشت کہ نیشنل ریسکیو چیلنج 2025 ءِ وڑیں مقابلہ پاکستان ءِ ایمرجنسی سروسز ءِ نیام ءَ پیشہ وارانہ ، نظم و ضبط ءُ عملی رابطہ ءِ دیمروئی ءَ ھاسیں کرد پیلو کن اَنت۔ نیشنل ریسکیو چیلنج ءِ ساھت ءَ پاکستان ءِ ٹاپ ریسکیو ٹیم وتی کارکردگی، ہنر ءُ ٹیم ورک ءِ وسیلگ ءَ ایمرجنسی جاوراں گوں گر ءُ چیل بوھگ ءِ توانائی ءِ درشان کنگ ءَ انت۔ آئی ءَ گوشت کہ اے چیلنج ءَ پنجاب، سندھ، خیبر پختونخوا ءُ گلگت بلتستان ءَ ھوار ملک ءِ جتا جتائیں دمگ آنی 15 راجی ٹیم آنی تہ ءَ بھر زوری بوتگ، ایشی ءِ تہ ءَ دلکش ءُ بے دروریں لائیو ریسکیو آپریشن پیش کنگ بوتگ، ایشی ءِ تہ ءَ حادثہ، آتش نشانی، مزنیں بُرزی ءُ گہتریں آپ ءِ تہ ءَ ریسکیو آپریشن ءِ وڑیں مقابلہ ھوار اَنت۔ پروفیسر احسن اقبال ءَ گوشت کہ اے وڑیں مقابلہ نہ ایوک ءَ ریسکیو کارندہ آنی ٹیکنیکل ھنر ءَ گیش کن اَنت بلکینگ ءَ جتاجتائیں صوبگ ءُ ادارگ آنی نیام ءَ کمک ءُ تجربت آناں مٹ ءُ بدلی ءَ را ھم دیمروئی دنت۔ آئی ءَ گوشت کجام ھم ملک ءِ دیمروئی آئی ءِ انسانی سرمایہ ءِ رکھینگ ءُ بحران آنی موثر انتظامی ءِ سر ءَ بندوک انت ءُ پاکستان ءَ ریسکیو 1122 اے رد ءَ راجی سرڈگار جوڑ بوتگ۔ آئی ءَ گوشت کہ من ریسکیو 1122 ءِ بنجاہی ءُ ڈائریکٹر جنرل ڈاکٹر رضوان نصیر ءُ آئی ءِ ٹیم ءِ ازمت آناں ساڑاتگ ءُ گوشت کہ اے ادارگ ءَ را نوکیں تربیت، نوکیں سامان ءُ ترندیں پسو ءِ دود ءُ ربیدگ ءِ وسیلگ ءَ الس ءِ بھروسہ زرتگ۔ پروفیسر احسن اقبال ءَ گوشت کہ پاکستان ءَ را ایمن، پائیدار ءُ دیمروئی کتگیں ملک جوڑ کنگ ءِ واستہ مارا وتی ادارگ آنی تہ ءَ کارکردگی، پیشہ وارانہ ءُ سرکاری ازمت ءِ جزبگ ءَ را مھکم کنگ لوٹ ایت۔ ایمرجنسی سروسز ءِ اے کوشست اے مول ءُ مراد ءِ سرجم کنگ ءِ ھاترا یک ھاسیں گامگیج ءِ انت۔ وفاقی وزیر پروفیسر احسن اقبال ءَ گوشت کہ نیشنل ریسکیو چیلنج 2025 ءِ وڑیں مقابلہ نہ ایوک ءَ سرجمیں ملک ءَ ایمرجنسی سروسز ءِ نیام ءَ پیشہ وارانہ ، ڈسپلین ءُ ٹیم ورک ءَ را گیش کنگ ءَ انت بلکینگ ءَ ریسکیو سروسز ءِ سر ءَ الس ءِ یقین ءَ را ھم گیش کنگ بیت۔ آئی ءَ گوشت کہ نوکیں رنگ ءَ تربیت یافتہ ءُ تکنیکی رد ءَ مھکمیں ریسکیو ٹیم کجام ھم راج ءِ واستہ اثاثہ انت۔ آئی ءَ گوشت کہ وزارت منصوبگ بندی توامیں ادارگ آنی تہ ءَ کارکردگی ءُ نتیجہ ءِ سر ءَ بنیات ءِ دود ءُ ربیدگ ءِ دیمروئی ءِ واستہ جزمیگ انت تانکہ پاکستان ءَ را ایمن ءُ برجمیں دیمروئی ءِ راہ ءَ ایر کنگ بہ بیت۔ اے موہ ءِ سر ءَ صوبائی وزیر خواجہ سلمان رفیق، ڈی جی ریسکیو ڈاکٹر رضوان نصیر ءُ اے دگہ مردم ھم ساڑی بوتگ انت۔