وفاقی داخلہ ءِ وزیر محسن نقوی ءَ خیبر پختونخوا ءِ گورنر فیصل کریم کنڈی ءَ گوں گند ءُ نند کتگ، صوبہ ءِ تہا امن ءُ ایمنی، ناشرکاری ءُ برجاھیں آپریشن ءِ بابت ءَ گپ ءُ تران

اسلام آباد۔20اکتوبر  (اے پی پی): وفاقی تہی کارانی وزیر محسن نقوی ءَ گوں خیبر پختونخوا ءِ گورنر فیصل کریم کنڈی ءَ گند ءُ نند کتگ ایشی ءِ تہ ءَ خیبر پختونخوا ءِ سرجمیں امن ءُ ایمنی ءِ جاور ھال، ناشرکاری ءِ گوستگیں وئیل ءُ برجاھیں آپریشن آنی سر ءَ سرجمیں رنگ ءَ گپ ءُ تران کنگ بوتگ۔ وزارت داخلہ ءِ جارکش ءِ رد ءَ گند ءُ نند ءَ فتنہ الخریج ءِ حلاف ءَ جتا جتائیں ضلع آنی تہ ءَ جاری آپریشن، پاک اوگان سیم سر ءِ جاور ھال ءُ ناشرکاری ءِ ھلاسی ءِ واستہ کتگیں گامگیج آنی سر ءَ ھم گپ ءُ تران کنگ بوتگ۔ دوئیں رہشوناں خیبر پختونخوا ءَ دائمی امن ءِ برجائی ءِ واستہ سیکورٹی فورسز ءِ قربانی آناں ساڑاتگ ءُ آہانی ازمت آناں شگر ءُ منت گپتگ۔ محسن نقوی ءَ گوشت کہ ڈیرہ اسماعیل خان ءَ پولیس ٹریننگ سینٹر ءُ نادر ءِ کارگس ءِ سر ءَ اُرش آنی تہ ءَ شھید بوتگیں ھما کارندہ آناں سرجمیں راج سلام اِنت ۔ آماچیں ماڑی آنی بحال کنگ ءِ عمل ءِ سر ءَ ھم تران کت۔ وزیر ءِ تہی کار ءَ گوشت کہ خیبر پختونخوا ءِ الس ءُ کانود ءِ نفاذ ءِ ادارگ ناشرکاری ءِ آفت ءَ گوں بہادری ءَ گوں جنگ ءَ انت۔ فتنہ الهندستان ءِ ناشرکار پاکستان ءِ تپاکی ءُ امن ءِ دژمن اَنت۔ اے زالمیں عناصر ءِ ھلاپ ءَ آپریشن برجاہ بنت ءُ ما پاکستان ءِ سرزمین ءَ چہ فتنہ الهندستان ءَ ھلاس کنیں۔ محسن نقوی ءَ اے گپ ءِ پدرائی کت کہ وفاقی حکومت صوبگ ءَ امن ءُ ایمنی ءِ برجائی ءُ ناشرکاری ءِ ھلاپ ءَ جنگ ءِ واستہ سرجمیں کمک ءَ کنگ ءَ انت۔ بھارت ءِ کمک ءَ ناشرکارانی نا شریں ارادہ کدی سوبمند نہ بنت۔ گورنر خیبر پختونخوا فیصل کریم کنڈی ءَ گوشت کہ خیبر پختونخوا ءِ الس امن ءِ حمایت کنوک اَنت، صوبہ ءِ دیمروئی ءُ وشھالی ءِ واستہ امن المی اِنت ءُ ملک ءُ قوم ءِ دژمن آنی ھلاپ ءَ انٹیلی جنس ءِ بنیات ءَ آپریشن وھد ءِ لوٹ اِنت۔ دوئیں رہشوناں وتی جزم ءِ درشانی کت کہ راج دژمنیں عناصر ءِ ھلاپ ءَ آپریشن سرجمیں زور ءَ برجاہ دارگ بنت دانکہ صوبہ ءَ دائمی امن ءِ ضمانت دیگ بہ بیت۔