اُرائی صنعت آتا رجسٹریشن نا است بڈی ءِ کننگ نا گرج ءِ، وزیراعظم شہباز شریف نا جاچ دیوان آن تران

اسلام آباد۔ 20 اکتوبر (اے پی پی) وزیراعظم محمد شہباز شریف اُرائی صنعت آتا رجسٹریشن نا است بڈی ءِ کننگ نا گرج آ زور شاغسا پارینے کہ پاکستان نا صنعتی شونداری اُرائی ، چنکا و نیامی کچ انا صنعت آتا شونداری تون گنڈوک ءِ۔ اودوشنبے نادے آ داڑے تینا کماشی ٹی سمیڈا نا تنظیم نو و ایس ایم ایز نا شونداری آ جاچ دیوان آن تران کریکہ۔ دیوان اٹی بنجائی وزیراحدخان چیمہ، ڈاکٹر مصدق ملک، عطاء اللہ تارڑ، خصوصی کمکار ہارون اختر وتعلقدار بڑزکو کمامدارآک بشخ ہلکر۔ دیوان اٹی سمیڈا نا تنظیم نو و ایس ایم ایز نا شونداری کن گام گیج آتیا حوال تننگا۔ وزیراعظم آفس نا میڈیا ونگ انا کنڈآن جاری بیان نا رداٹ دیوان آن تران کرساوزیراعظم شہباز شریف پارے کہ چنکا و نیامی درجہ نا صنعت(ایس ایم ایز) اٹی زالبول آتا شمولیت ءِ ودفنگ کن گام گیج ستاکڑزک  دا بابت آگاہی ءِ لس کننگ نا گرج ءِ۔ وزیراعظم اُرائی صنعت آتا رجسٹریشن نا است بڈی ءِ کننگ نا گرج آ زور شاغا تانکہ اوفتے کاروبار ءِ مون آ دننگ کن وام تا دوئی کننگ آسانی مرے۔ وزیراعظم پارت کرے کہ سمیڈا نا روڈ میپ نا اطلاق نا پیدوار مد طے مرے و اطلاق زوت آن زوت پک کننگے۔ اوپارے کہ پاکستان نا صنعتی شونداری اُرائی، چنکا و نیامی کچ انا صنعت آتا شونداری تون گنڈوک ءِ، شون ہلوک ملک آتیٹی بھلا صنعت آتا خام مال ایس ایم ایز فراوان کیک، کشاری اجناس نا پراسیسنگ کن خلقی علاقہ غاتیٹی ایس ایم ایز نا بابت تربیت ءِ پک کننگے۔ وزیراعظم سمیڈا نا تنظیم نو و ایس ایم ایز نا شونداری وزارت صنعت وپیدوار نا گام گیج آتیا است جمی نا درشانی ءِ کرے۔ دیوان اٹی حوال اٹی پاننگاکہ آزاد کشمیر و گلگت بلتستان اٹی ایس ایم ایز نا شونداری کن دفتر ملنگانے ہرانا الس و چیمبرز نا کنڈآن ستاءِ کننگ انگ ءِ، سمیڈا نا نجی بشخ انا چاہندار آتیا تالان بورڈ ٹہیفنگانے وخت اس کہ بروک آمنہ دے اٹی چیف ایگزیکٹیو آفیسر نا تعیناتی نا عمل پورو کننگک۔ دیوان ءِ مستی پاننگاکہ سٹیئرنگ کمیٹی نا پرمان تا سوب ایس ایم ایز نا کچ، وام تا فراوانی، سرمایہ و شریداری ٹی خاطرخواہ ودکی مسنے، زالبول آتا ایس ایم ایز بشخ اٹی است بڈی کن زالبول انٹرپرینیور شپ پلیٹ فارم اس ٹہیفنگ انگ ءِ ہرا مصنوعی ذہانت آ تالان مریک۔ دا پلیٹ فارم زالبول آتے کاروباری بشخ انا بابت پورو معلومداری فراوان کننگ تون اوار اوار رجسٹریشن، خراج باندات و کسب نا آگاہی ہم ایتک۔ دیوان اٹی ایس ایم ایز ءِ رسمی زرگزران نا بشخ جوڑ کننگ کن گا م گیج آتا روڈ میپ ہم پیش کننگا۔