وزیراعظم شہباز شریف نا صنعتی و کشاری پیدوار اٹی ودکی کن بجلی نا گچین کاریم اٹ اتنگ نا جوان حکمت عملی اس ترتیب تننگ نا پارت

اسلام آباد۔ 20 اکتوبر (اے پی پی) وزیراعظم محمدشہباز شریف وزارت توانائی ءِ بجلی نا پیدوار نا گچین کاریم اٹ اتنگ آن صنعتی پیداوار و کشاری مصنوعات اٹی ودکی کن جوان حکمت عملی اس ترتیب تننگ ناپارت کرساپارینے کہ کشاری و صنعتی بشخ ءِ ہرممکن آسراتی تا فراوانی حکومت نا اولیت آتیٹی اوار ءِ۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی صنعتی و کشاری بشخ اکن پاور ڈویژن نا اصلاحاتی پیکج نا بابت جاچ دیوان مس۔ وزیراعظم ءِ پاور ڈویژن نا کنڈآن ملک اٹی بجلی نا پیداوار و اونا جوان و گچین کاریم اٹ اتنگ آ گمانی اصلاحاتی پیکج آ حوال تننگا۔ وزیراعظم پارت کرے کہ ملکی صنعتی پیداوار ءِ ودفنگ کن بجلی نا فراوانی نا بابت پاور ڈویژن جوان و گچین پالیسی سلاہ و سوج جوڑکے، صنعتی پیداوار تون تعلقدار غٹ ادارہ غاک صنعت کار و زرکارآتا آسراتی کن ہرممکن گام گیج کیر ، ملک اٹی بجلی نا پیدوار نا زیات آن زیات مثبت کاریم اٹ اتنگ ءِ پک کننگ کن پالیسی آ کاریم کننگے۔ اوپارے کہ بجلی نا پیدوار نا گچین کاریم اٹ اتنگ صنعتی مصنوعات و کشاری پیدوار اٹی ودکی کن کننگ مریک۔ وزیراعظم وزارت توانائی ءِ بجلی نا پیدوار نا گچین کاریم اٹ اتنگ آن صنعتی و کشاری پیدوار اٹی ودکی کن جوان حکمت عملی ترتیب تننگ و پاور ڈویژن ءِ زرکار وصنعت کارآتا آسراتی کن چندی سلاہ و سوج مرتب کننگ نا پارت کرے۔ دیوان اٹی بنجائی وزیر توانائی سردار اویس خان لغاری، بنجائی وزیر حوالکاری و شینکاری عطاء اللہ تارڑ، بنجائی وزیر اقتصادی امور ڈویژن احدخان چیمہ، سلاہکار صنعت ہارون اختر و ایلو تعلقدار سرکاری عہدیدار، آفیسر و کارندہ غاک بشخ ہلکر۔