اسہ جون اسے بچفنگ مچ آ انسانیت ءِ بچفنگ نا بریبرءِ، ننا ریسکیو رآک ہڑدے چندی جون تے بچفرہ، بنجائی وزیر پروفیسر احسن اقبال نا نیشنل ریسکیو چیلنج آن تران

لاہور۔ 20 اکتوبر (اے پی پی) بنجائی وزیر ڈٹ بندی، شونداری و اصلاحات پروفیسر احسن اقبال پارینے کہ اسہ جون ءِ بچفنگ مچ آ انسانیت ءِ بچفنگ نا بریبرءِ، ننا ریسکیورز ہڑدے ئی چندی جون تے بچفسا اصل اٹ انسانیت ءِ بچفرہ۔ اوداخیال آتا درشانی ءِ دوشنبے نادے آ ٹھوکر نیاز بیگ اٹی ایمرجنسی سروسز اکیڈمی ٹی اڈ ہلوک نیشنل ریسکیو چیلنج 2025 آن تران کرساکرے۔ بنجائی وزیرپارے کہ 2008 اٹی ہراتم اوڑآ قاتلانہ جلہو مس تو ریسکیو 1122 نا کارندہ غاک اودے وخت آ ہسپتال آ سرکریر۔ اوپارے کہ پنجاب اٹی نوکاپ نارووال آن بناکرے و ریسکیونا  ورناک ہزار آ بندغ آتے وخت آ کشسا رکھ ہند آتیا گدریفیر۔ اوپارے کہ بروک آ نیشنل ریسکیو چیلنج اٹی زالبول آتا زیات شمولیت ءِ ہُننگ خوانہ۔ اخہ در زیات زالبول آک ریسکیو سروس نا بشخ جوڑمریرہ ، زالبول آتے ریسکیو کننگ اٹ ہنداخہ ہی آسانی مریک انتئے کہ زالبول آک داسہ اسہ پڑاسے ٹی ہم نرینہ غاتیان کم افس۔ اوپارے کہ 1998ٹی ہراتم وزیراعظم محمد نواز شریف ایٹمی دھماکہ کرے تو ڈاکٹر عبدالقدیر خان اسہ اہم ڈٹ اسے نا چرجوئی ٹی اوڑآ بس۔ ای اوڑآن اریفیٹ کہ ہراتم نن ایٹمی طاقت دوئی کرین تو اسہ ملک اس ہم ننتون تفوک الو، کس اس امداد تتو، ولدا نی دا سرسہبی ءِ امر دوئی کریس؟ ڈاکٹر عبدالقدیر خان ہراسرسہبی نا فارمولہ نا پارے، ہمو فارمولا کنے ریسکیو ادارہ ٹی نظربریک کہ ادارہ نا ہربندغ چائے او سیکورٹی گارڈ اس مرے یا ڈیوراس، تینے اسہ مشن نا بشخ تکاکہ۔ بنجائی وزیر احسن اقبال پارے کہ ریسکیو 1122 نا سرسہبی ٹی ڈاکٹر رضوان نصیر کون آ لائخ آ سرکڑدہ نا خذمت ستاکڑزک۔