پاک۔ اوغان معاہدہ نا بنداوی مسخت دہشت گردی نا ویل ءِ چٹفنگ ءِ، معاہدہ نا سرجم آتے گڈیکو دروشم اس تننگ کن اسہ پین دیوان اس بروک آ ہفتہ استنبول اٹی مریک، وزیردفاع خواجہ محمد آصف نا الجزیرہ ءِ انٹرویو

اسلام آباد۔ 20 اکتوبر (اے پی پی) وزیردفاع خواجہ محمد آصف پارینے کہ پاکستان و اوغانستان نا نیام اٹ معاہدہ نا بنداوی مسخت دہشت گردی نا ویل ءِ چٹفنگ ءِ، معاہدہ نا سرجم آتے گڈیکو دروشم اس تننگ کن اسہ پین دیوان اس بروک  آ ہفتہ استنبول اٹی مریک، اومیت ءِ کہ داسہ امن بحال مریک و پاکستان و اوغانستان نا تعلقداری معمول آ بریرہ۔ داخیا ل آتا درشانی ءِ او پاکستان و اوغانستان نا نیام اٹ جنگ بندی معاہدہ نا بابت الجزیرہ ءِ انٹرویو ترساکرے۔ اوپارے کہ قطر انا امیر شیخ تمیم بن حمد آل ثانی، ترک صدر طیب اردوان و ترک ڈل انا سروک ابراہیم نا منت واری ءِ ہرفنہ، پاکستان و اوغانستان نا نیام اٹ معاہدہ نا بنداوی مسخت دہشت گردی نا ویل ءِ چٹفنگ ءِ۔ وزیردفاع پارے کہ دہشت گردی سال آتیان پاکستان و اوغانستان نا سیمی علاقہ غاتے زہمی کننگ ءِ، تدوک آہفتہ دہشت گردی نا ویل ہڑتوم آملک آتا نیام اٹ براہ راست جھیڑہ اسکان سرمسوسس، ہڑتوم آملک آک دا نتیجہ غا رسینگانو کہ دہشت گردی ءِ دمدستی چٹفنگ المی ءِ، ہڑتوم آملک آک دہشت گردی نا مون ءِ توننگ کن سنجیدہ کوشست کیرہ ورنہ ڈیہہ اناامن ءِ بھلو خطرہ اس مون تروک مننگ کیک۔ اوپارے کہ دا معاہدہ بنداوی وڑاٹ قطر و ترکیہ نا ثالثی اٹ مسنے، معاہدہ نا سرجم آتے گڈیکو دروشم اس تننگ کن اسہ پین دیوان اس بروک آ ہفتہ استنبول اٹی مریک ہراٹی معاہدہ نا سرجم آتیا امنا کننگک۔ خواجہ محمد آصف پارے کہ اوغان وزیر دفاع امنا کرے کہ دہشت گردی ننا تعلقداری ٹی تناؤ نا اصل سوب ءِ ہراناداسہ مون ءِ توننگک، اسہ جوان ءُ وڑوڈول اس پیدوار کننگک تانکہ ہڑتوم آملک آتا نیام اٹ ساڑی ویل آتے ایسر کننگ مرے، قطر و ترکیہ نا ساڑی گری دامعاہدہ غا بذات خود ضمانت ءِ۔ اوپارے کہ نن تدوک آ سال آتیٹی بھلو کچ اسے آ جونی ومالی نسخان ہرفینن، اومیت ءِ داسہ امن بحال مریک وپاکستان واوغانستان نا تعلقداریک معمول آ بریرہ۔