پارلیمان غٹ مذہب آتا منوک آتا نیام اٹ ہم گرنچی نا مون آ دننگ اٹ تینا پبی کڑد ءِ اداکرسا  کیک، اسپیکر قومی اسمبلی سردار ایاز صادق نا دیوالی نا وخت آ کلہو

اسلام آباد۔ 20 اکتوبر (اے پی پی) اسپیکر قومی اسمبلی سردار ایاز صادق پارینے کہ رواداری، تین پہ تینی شرف و سگ آ تالان راج ہی حقی شونداری نا ضامن ءِ، پارلیمان غٹ مذہب آتا منوک آتا نیام اٹ ہم گرنچی ءِ مون آ دننگ اٹ تینا پبی کڑد ءِ ادا کرساکیک۔ دوشنبے نادے آ دیوالی نا وخت آ تینا کلہو اٹی اوہندوبرادری آن تعلق تخوک آ پارلیمنٹرینز و پاکستان تون اوار مچ آدنیا نا ہندوبرادری ءِ دیوالی نا مبارکبادی تس وپارے کہ دیوالی امن، مہرومریبت و روشنائی تا تہوار ءِ، پاکستان اٹ رہینگوک آ غٹ مذہب آتا منوک آتے بریبر حق دوئی ءِ، پارلیمان ملک اٹی رہینگوک آ غٹ مذہب آتا منوک آتا حق انا رکھ اکن سنبرینگوک ءِ۔ اوپارے کہ قومی یکجہتی و مذہبی ہم گرنچی پاکستان نا سوگوی و شونداری نا ضامن ءِ، پاکستان نا آئین اقلیت آتا حق انا رکھ انا ضمانت ایتک، پاکستان اٹ ہرشاری ءِ تینا مذہبی عقیدہ و رسم آتا رداٹ زند ءِ تیر کننگ نا پورو آجوئی دوئی ءِ، ملکی شونداری و شونہالی ٹی اقلیتی برادری نا کڑد ستاکڑزک۔