بنجائی وزیر داخلہ محسن نقوی تون گورنر خیبرپختونخوا فیصل کریم کنڈی نا اوڑدہی

اسلام آباد۔ 20 اکتوبر (اے پی پی) بنجائی وزیر داخلہ محسن نقوی تون گورنر خیبرپختونخوا فیصل کریم کنڈی اوڑدہی کرے ہراٹی خیبرپختونخوا ٹی امن وایمنی نا جم حالیت، دہشت گردی نا ساڑی آ واقعہ و برجاآپریشن تا بارواٹی سرجمی اٹ گپ وتران کننگا۔ ترجمان وزارت داخلہ نا رداٹ اوڑدہی ٹی فتنۃ الخوارج نا برخلاف چندی ضلع غاتیٹی برجاکارروائی، پاک اوغان سیمی حالیت و دہشت گردی نا چٹفنگ کن کروک آ گا م گیج آتا بارواٹی ہم گپ وتران مس۔ ہڑتوم آ راہشونک خیبرپختونخوا ٹی پائیدار امن کن سیکورٹی فورس آتا قربانی تا ستاءِ کرے و اوفتا خذمت آتے خراج تحسین پیش کرے۔ محسن نقوی پارے کہ پولیس ٹریننگ سینٹر و نادرا آفس ڈیرہ اسماعیل خان آ جلہو آتیٹی شہید مروک آ کارندہ غاتے مچ آ قوم سلام پیش کیک۔ اوزہمی ماڑی تا اول سرآن بحالی نا عمل نا بارواٹی ہم گپ وتران کرے۔ وزیرداخلہ نا پاننگ ئس کہ خیبرپختونخوا نا الس و کانود نافذ کروک آ ادارہ غاک بہادری اٹ دہشت گردی نا ناسور نا مقابلہ ءِ کننگ ءُ، فتنۃ الہندوستان نا دہشت گرد آک پاکستان نا یکجہتی و امن نا دشمن ءُ، دا درندہ صفت زموار آتا برخلاف آپریشن برجاسلک و نن پاکستان نا گل زمین آن فتنۃ الہندوستان ءِ چٹفسا آسرات تولنہ۔ محسن نقوی پیدوار کرے کہ بنجائی حکومت صوبہ ٹی امن و ایمنی و انسداد دہشت گردی کن پبی کمک فراوان کننگ ءِ، بھارتی مخ تف دہشت گرد آتا ناپاک عزم ءِ اسُل سرسہب مننگ کن اِلیپنہ۔ گورنر خیبرپختونخوا فیصل کریم کنڈی پارے کہ خیبرپختونخوا نا الس امن نا داعی ءِ، صوبہ نا شونداری و شونہالی کن امن المی ءِ و ملک و قوم انا دشمن تا برخلاف انٹیلی جنس بیسڈ آپریشن وخت انا گرج ءِ۔ ہڑتوم آ راہشونک داعزم انا درشانی ءِ کریر کہ ملک دشمن زموار آتا برخلاف کارروائی پورو واک اٹ برجاسلک تانکہ صوبہ ٹی پائیدار امن ءِ پک کننگ مرے۔