حکومت ہر کمیونٹی ءِ بریبر حق و شونداری نا اسہ وڑ وارخواہی فراوان کننگ نا عزم کرینے، وزیراعظم شہباز شریف نا دیوالی آ ہندوبرادری ءِ مبارکباد

اسلام آباد۔ 20 اکتوبر (ا ے پی پی) وزیراعظم محمد شہباز شریف پارینے کہ حکومت ہرکمیونٹی ءِ اوفتا عقیدہ غان ایڑتر بریبر حق و شونداری نا اسہ وڑ وارخواہی فراوان کننگ نا عزم کرینے، پاکستان تون اوار مچ آ دنیا ٹی ساڑی ہندوبرادری ءِ دیوالی نا مبارکبادی ترسا وزیراعظم پارے کہ دیوالی روشنائی تا تہوار ءِ و روشنائی نا تہاری آ و اومیت نا مایوسی آ سرسہبی نا جشن انا عکاسی ءِ کیک۔ وزیراعظم آفس نا میڈیا ونگ انا کنڈآن جاری بیان نارداٹ وزیراعظم پارے کہ دیوالی ءِ اڈتننگ نا وخت آ ببو نن غٹ اواری اٹ آخبت ءِ مثبت سوچ و سیوت نا نظریہ ٹی ہُرن۔ وزیراعظم پارے کہ پاکستانی مننگ نا ناطہ نن تینا راج اٹی تنوع آ گمر کینہ ہرا ننا قومی دنگ ءِ پین سوگو کیک و ننا اسیجائی دودوربیدہ ءِ سوگوی ایتک۔ وزیراعظم پارے کہ داوخت آ او پاکستان اٹ ہندوبرادری نا خذمت آتے خراج تحسین پیش کیک ہرافتا ننا راجی، اقتصادی و سیاسی بشخ آتیٹی کڑد ننا قوم ءِ سوگو کننگ ءِ۔ اوپارے کہ پاکستان اٹی عقیدہ غاتا تنوع ننا مخلوق نا نیام اٹ سیوت نا حقی ذریعہ ءِ، ہندو و ایلواقلیتی برادری آن تعلق تخوک آ پاکستانی تے تینا ملک انا شونداری کن تینا مسلمان ایڑھ ایلم تتون ہم کوپہ کاریم کرسا کنے بھاز خوشی مریک۔ وزیراعظم پارے کہ بابائے قوم قائد اعظم محمد علی جناح اسہ ہندن ءُ پاکستان اسے نا تصور ءِ تسوسس ہراڑے غٹ برادری تے بے پرخ مذہب، نسل یا ذات انا بریبری و آجوئی دوئی مرے، حکومت دا قدر آتے برقرار تخنگ و داہیت ءِ پک کننگ کن سنبرینگوک ءِ کہ پاکستان اٹی ہر کمیونٹی ءِ اوفتا عقیدہ غان ایڑتر بریبر حق و اسہ وڑ شونداری نا وارخواہی دوئی مرے۔ اوہندو برادری کن نیک است خواہی نا درشانی ءِ کرساپارے کہ روشنائی تا دا تہوار اوفتا زند اٹی امن و شونہالی اتے وننا ملک اٹی غٹ مذہب آتا مخلوق نا نیام اٹ سیوت  وایلمی نا سوگو رشتہ غاتے مون آ دے ۔