راجی اسمبلی ءِ اسپیکر سردار ایاز صادق ءَ پاکستان ءُ اوگانستان ءِ نیام ءَ جنگ بندی ءِ منوگری ءَ را وش اتک کتگ

اسلام آباد۔19اکتوبر  (اے پی پی):راجی اسمبلی ءِ اسپیکر سردار ایاز صادق ءَ قطر ءِ مزن شہر دوحہ ءَ پاکستان ءُ اوگانستان ءِ نیام ءَ جنگ بندی ءِ منوگری ءَ را وش اتک کنان ءَ گوشت کہ دوئیں ملک آنی نیام ءَ جنگ بندی ءِ منوگری دمگی برجائی ءِ نیمگ ءَ ھاسیں گامگیج اِنت۔ پاکستان مدام ھمساھگیں ملک آنی گوما ایمن ءُ ایمنی ءِ ھواری، گپ ءُ تران ءُ شرپ ءِ سر ءَ ایمان داریت۔ قومی اسمبلی ءِ سیکرٹریٹ میڈیا ونگ ءِ نیمگ ءَ جاڑی بوتگیں بیان ءِ رد ءَ اسپیکر سردار ایاز صادق ءَ گوشت کہ امن ءُ ایمنی دوئیں ملک آنی اُلس ءِ یکجائی لوٹ اَنت۔ پڑ ءَ امن ءُ ایمنی ءِ واستہ پاکستان ءِ گامگیج ستا کرز اَنت۔ پاکستان ءَ ناشرکاری ءِ ھلاپ ءَ جنگ ءَ مزنیں بھا ادا کتگ ۔ اسپیکر سردار ایاز صادق ءَ گوشت کہ پاکستان ءَ ھمساھگیں اوگانستان ءَ چہ 4 لکھ ءُ نیم پناہ گیر آنی ازمت کتگ۔ پاکستان ءَ اوگان پناہ گزین آنی ھزمت ءَ چہ ھمساھگی ءِ بے وھدیں کسہ جوڑ کتگ۔ اسپیکر سردار ایاز صادق ءَ گوشت کہ پاکستان گوستگیں سئے دہائی ءَ چہ ناشرکاری ءِ ھلاپ ءَ جنگ ءَ انت، پاکستان ءَ ناشرکاری ءِ ھلاپ ءَ جنگ ءَ 90 ہزار ءَ چہ گیش گران بھائیں جان ندر کتگ انت۔ اسپیکر سردار ایاز صادق ءَ گوشت کہ اوگانستان ءَ ایمنی پاکستان ءَ ایمنی ءَ گوں بندوک انت، سیاسی ءُ فوجی سروکی ءِ تپاکی ءَ چہ ممکن بوتگیں جنگ بندی وش اتک انت۔ اسپیکر ءَ 25اکتوبر ءَ استنبول ءَ بوھوکیں گپ ءُ تران ءِ دومی بھر ءِ جار ءَ را وش اتک کت ءُ گوشت کہ پڑ ءَ دائمی امن ءِ برجائی ءِ واستہ گپ ءُ تران ءِ عمل ایوک ءَ گارنٹی اِنت، پاکستان ءُ اوگانستان ءِ سیادی آنی تہ ءَ گہتری سرجمیں پڑ ءِ نپ آنی تہ ءَ اِنت۔ اسپیکر سردار ایاز صادق ءَ دوئیں ملک آنی نیام ءَ اعتماد سازی ءُ کمک ءِ عمل ءَ را گیش مھکم کنگ ءِ ضلورت ءِ سر ءَ زور پر دات، ناشرکاری ءِ ھلاسی ءُ امن ءِ دیمروئی ءِ واستہ یکجائی کوشست وھد ءِ ضلورت انت۔ اسپیکر سردار ایاز صادق ءَ اے امیت سہرا کت کہ اے جنگ بندی یک دراجیں مدتی امن منوگری ءِ تہا بدل بیت۔ دوئیں ملک آں مردم آنی نیام ءَ رابطہ ءُ اقتصادی کمک ءَ را دیم ءَ برگ بہ بیت۔ پارلیمنٹ خطہ ءِ تہا امن ءِ دیمروئی ءِ ھاتر ءَ ہر ممکنیں کرد ءَ پیلو کنت۔ اسپیکر سردار ایاز صادق ءَ پاکستان ءُ اوگانستان ءِ نیام ءَ جنگ بندی ءِ منوگر ءِ تہ ءَ جوانیں کرد ءِ پد ءَ براتیں ملک قطر، ترکی ءُ اے دگہ دوستیں ملک آنی شگر ءُ منت گپت۔