اسپارکو ءَ پاکستان ءِ اولی ہائپر اسپیکٹرل سیٹلائٹ سوبمندیں رنگے ءَ شنگ کتگ

اسلام آباد۔19اکتوبر  (اے پی پی): پاکستان ءِ خلائی ءُ بالائی جوہ ءِ پٹ ءُ پولی کمیشن ءَ چین ءِ سیٹلائٹ لانچ سینٹر ءَ چہ پاکستان ءِ اولی ہائپر اسپیکٹرل سیٹلائٹ (ایچ ایس ون) ءَ را خلاء ءَ سوبمندیں رنگ ءَ روان دیگ ءَ مزنیں سنگ میل ءِ سر ءَ چہ دیم ءَ شتگ۔ وزارت خارجہ ءِ نیمگ ءَ یک شمبے ءِ روچ ءَ جاڑی بوتگیں بیان ءِ رد ءَ ایچ ایس ون ءَ را جدید ہائپر اسپیکٹرل امیجنگ ٹیکنالوجی ءِ وسیلگ ءَ ھوار کنگ بوتگ کہ ایشی ءِ تہ ءَ سداں تنگیں اسپیکٹرل بینڈ آنی وسیلگ ءَ ڈیٹا ءِ گرگ ءِ توان ھست۔ اے توانائی ءَ چہ زمین ءِ کارمرد کنگ، نباتات ءِ جان سلامتی، آبی منابع ءُ شہری دیمروئی ءِ سرا دُرستیں نگرانی ءُ تجزیہ کنگ بیت۔ سیٹلائٹ ءَ چہ درستیں زرعی منصوبگ بندی، چاگردی نگرانی، شہری منصوبگ بندی ءُ قدرتی آفت ءِ گر ءُ دار ءِ وڑیں کلیدی راجی شوبگ آنی تہ ءَ توانائی آناں مزنیں کساس ءَ گیش کنگ بیت۔ ایشی ءِ مزنیں کوالٹی ءِ ڈیٹا ءَ چہ پاکستان ءَ را وسیلگ آنی جوانیں رنگ ءَ انتظام کنگ ءُ موسمیاتی بدلی ءِ سبب ءَ پیداکیں چیلنج آناں دیم ءَ آرگ ءَ کمک رسیت۔ ایچ ایس 1 اے زمین ءِ ھترہ آنی پجارینگ ءُ دیمروئی منصوبگ آنی چیر دستی ءَ پائیداریں بنیاتی ڈھانچگ ءِ دیمروئی ءَ ھم کمک کنت، ھاسیں رنگ ءَ چین ءُ پاکستان ءِ اقتصادی راہداری ءِ چیر دستی ءَ۔ ایچ ایس ون ءِ سوبمندیں شنگ کنگ پاکستان ءِ خلائی پروگرام ءِ تہ ءَ یک مزنیں سنگ میل ءِ اِنت ءُ راجی دیمروئی ءِ واستہ خلائی ٹیکنالوجی ءَ را کارمرد کنگ ءِ واستہ سپرکو ءِ عزم ءِ نوک کنگ اِنت۔ اے سوبمندی پاکستان ءُ چین ءِ نیام ءَ پرامن خلائی پٹ ءُ پول ءِ تہ ءَ دیریں کمک ءُ چاگردی ءُ اقتصادی دیمروئی ءِ واستہ ایشی ءِ کارمردی ءِ ھم درشان اِنت۔ نائب مزن وزیر ءُ دری کارانی وزیر سینیٹر محمد اسحاق ڈار ءَ ایچ ایس ون منصوبگ ءِ سر ءَ کار کنوکیں پاکستان ءُ چین ءِ سائنسدان ءُ ٹیکنیشن آناں ساڑاتگ ءُ آوانی پیشہ وارانہ ، لگن ءُ جوانیں کمک ءَ را شگر ءُ منت گپتگ۔