پاکستان ءَ پاک اوگانستان ءِ سیمسر ءِ دمگاں درملکی گل بہادر گل ءِ پدر بوتگیں پناہ گاہ نشانگ جوڑ کتگ اَنت، 100 ءَ چہ گیش درئی ناشرکار بیران بوتگ اَنت، عطا اللہ تارڑ

اسلام آباد۔18اکتوبر  (اے پی پی): بنجاھی وزیر اھوالکاری ءُ شنگ کاری عطا اللہ تارڑ ءَ گشتگ کہ  پاکستان ءُ اوگانستان ءِ سیم سر ءِ کش ءَ شمالی ءُ جنوبی وزیرستان ءِ ضلع آنی سیمسر ءِ دمگاں درملکی گل بہادر گل ءِ تصدیق بوتگیں پناہ گاہ نشانگ جوڑ کتگ انت، 100 ءَ چہ گیش درئی ناشرکار کشگ بوتگ انت۔ شمبے ءِ روچ ءَ سوشل نیٹ ورکنگ پلیٹ فارم ’’ایکس‘‘ ءِ سر ءَ وتی پوسٹ ءِ تہ ءَ بنجاھی وزیر ءِ اھوالکاری ءَ گوشت کہ 48کلاک ءِ دراجیں جنگ بندی ءِ ساھت ءَ اوگانستان ءَ چہ کار کنوکیں درملکی جنگولاں پاکستان ءَ بازیں ناشرکاری اُرش کنگ ءِ کوشست کتگ کہ ایشی ءِ سر ءَ سیکورٹی فورسز ءَ جوانیں رنگ ءَ پسو داتگ۔ آئی ءَ گوشت کہ سیکورٹی فورسز ءِ موثر جوابی کارروائی ءِ ساھت ءَ 100 ءَ چہ گیش درئی ناشرکار بیران بوتگ۔ درملکی ایکس گل بہادر گل ءَ شمالی وزیرستان ءَ گاڑی ءِ سر ءَ ھم آئی ای ڈی اُرش کتگ کہ ایشی ءِ تہ ءَ لس مردم ءُ یک سپاھیگے شھید بوتگ ءُ بازیں مردم ٹپیگ بوتگ اَنت۔ درملکی ایکس گل بہادر گروپ ءِ ھلاپ ءَ گوستگیں شپ ءَ یک ٹھینگ ءُ ٹارگٹڈ آپریشن ءِ کنگ بوتگ۔ انٹیلی جنس ءِ رپورٹانی رد ءَ اے کارروائیانی تہ ءَ کم چہ کم 60 تاں 70 درملکی ایکس گل بہادر ءُ آھانی ھمراھ بیران بوتگ اَنت۔ آئی ءَ گوشت کہ لس مردم آناں نشانگ جوڑ کنگ ءِ ھوالگ ءَ جتگیں دراہیں بھتام ءُ دعویٰ دروگ اَنت ءُ ایشانی مول ءُ مراد اوگانستان ءِ اندر ءَ چہ کار کنوکیں ناشرکاریں گل آناں کمک کنگ اِنت۔ پاکستان ءَ را دل ءِ جہلانکی ءَ اے گپ ءِ سر ءَ دل یکیمی اِنت کہ بھارتی چیردستی ءَ اوگان سرزمین ءَ چہ پیداکیں ناشرکاری ءِ اے سنگینیں جیڈھ ءِ گیواری گپ ءُ تران ءُ غیر ریاستی کارکن آنی سر ءَ اوگان واکدار آنی نیمگ ءَ چہ موثر کنٹرول ءِ وسیلگ ءَ ممکن اِنت۔ بلے پاکستان ءَ وتی سرزمین ءِ یکوئی ءُ وتی راج ءِ جان ءِ رکھینگ ءِ سرجمیں حق است ءُ ما اوگان سرزمین ءَ چہ کار کنوکیں ناشرکاراں بے کاریں نندگ ءِ موہ نہ دئیں۔