ایمن کار ءِ جوڑ کنگ ءِ تہ ءَ پاکستان ءِ کرد ءُ تعمیری کرد ءَ را گیش ءُ گیوار کنگ بوھگ ءَ اِنت، دری کارانی کارگس ءِ جارکش

اسلام آباد۔17اکتوبر  (اے پی پی):دری کارانی کارگس ءِ جارکش شفقت علی خان ءَ گوشت کہ مزن وزیر محمد شہباز شریف ءَ مصر ءِ صدر عبدالفتاح السیسی  ءُ  ڈونلڈ ٹرمپ  ءِ یکجائی دعوت ءِ سر ءَ 13 ءَ بگر داں 14 اکتوبر ءَ شرم الشیخ ءِ مزنیں سفارتی تر ءُ تاب کتگ۔ جمعہ ءِ روچ ءَ ادا پریس بریفنگ ءَ گوں تران کنان ءَ آئی ءَ گوشت کہ مزن وزیر ءَ نائب مزن وزیر ءُ دری کارانی وزیر ءِ گوما کابینہ ءِ مزنیں باسک آنی گوما مزنیں تک ءِ باز نیمگی گامگیج ءَ بھر زوری کتگ ایشی ءِ مول ءُ مراد غزہ ءَ مزنیں انسانی ءُ ایمنی ءِ جیڈھ ءِ گیواری اِنت۔ آئی ءَ گوشت کہ ایمن سفارتکاری ءِ تہ ءَ پاکستان ءِ سرگرمیں کرد ءَ چہ جھان ءِ ایمن ءُ انصاف ءِ واستہ یک ذمہ واریں ملک ءِ بستار ءَ پاکستان ءِ بستار مھکم بوتگ۔ ترجمان ءَ گوشت کہ ایمن کار ءِ جوڑ کنگ ءَ پاکستان ءِ کرد ءُ جوڑیشت ءِ تہ ءَ پاکستان ءِ کرد ءَ را گیش ءَ چہ گیش منگ بوھگ ءَ اِنت وھدیکہ دمگی ایمنی ءُ کمک ءِ واستہ پاکستان ءِ سروکیں مسلمان ملک ءِ بستار ءَ را مھکم کنگ بوھگ ءَ اِنت۔ ترجمان ءَ گوشت کہ شرم الشیخ ءَ سروکیں دیوان ءَ برطانیہ ءِ مزن وزیر، جرمن چانسلر، ترکی ءِ صدر، گتر ءِ امیر، انڈونیشیا ءِ صدر، کینیڈا ءِ مزن وزیر ءُ مسلمان ءُ یورپی ملک آنی دگہ بازیں سروک آنی تہ ءَ نزیک ءَ 30 سروک آنی بھر زوری بوتگ۔ آئی ءَ گوشت کہ مراگش ءِ تہ ءَ ایمن معاہدے ءِ ضایمن ءِ بستار ءَ امریکا، مصر، گتر ءُ ترکی ءِ نیمگ ءَ دستاویز ءِ سر ءَ دستخط کنگ ءِ چار نیمگی مراگش ھم ھوار ات۔ ترجمان ءَ گوشت کہ سروک دیوان ءِ سرکاری شیڈول ءِ رد ءَ دستخط ءِ مراگش ءَ پد ایوک ءَ صدر ٹرمپ ءُ صدر السیسی ءَ بیان دیگ بوتگ بلے ایجنڈا ءِ برخلاف صدر ٹرمپ ءَ مزن وزیر محمد شہباز شریف ءَ را گپ جنگ ءِ دعوت داتگ۔ مزن وزیر محمد شہباز شریف ءَ وتی کسانیں گشتانک ءِ تہ ءَ صدر ٹرمپ ءِ منت گپت کہ آئی ءَ بازیں دمگ آنی تہ ءَ ھاسیں رنگ ءَ غزہ ءَ ایمن ءِ برجائی ءِ واستہ مثالی سروکی داتگ۔ آئی ءَ ھندوستان ءُ پاکستان ءِ نیام ءَ جیڑھاں گر ءُ دار کنگ ءِ واستہ صدر ٹرمپ ءِ ھم شگر ءُ منت گپت۔