بنجائی وزیر مذہبی امور سردار محمد یوسف تون برطانوی ہائی کمشنر جین میریٹ نا اوڑدہی

اسلام آباد۔ 17 اکتوبر (اے پی پی) بنجائی وزیر مذہبی امور سردار محمد یوسف تون جمعہ نادے آ برطانوی ہائی کمشنر جین میریٹ اوڑدہی کرے ہراٹی ہڑتوم آ کنڈآتا تعلقداری تون اوار تین پہ تینی است خواہی نا امور تیا گپ وتران کننگا۔ داوخت آ گپ وتران کرسا وزیر مذہبی امور پارے کہ ننے تینا شاندار روایت و دودوربیدہ ئی میرات آ تیا بھاز گمر ءِ، پاکستان برطانیہ تون تعلقداری تے قدر انا نظر اٹ ہرک و بروک آ وخت اٹی داکمکاری ءِ پین ودفنگ نا خواہندار ءِ۔ اوپارے کہ بھارت اٹی مسلمان وایلو اقلیت آتیا ریاستی سرپرستی ٹی مروک آ ظلم و ستم اٹی ودکی تشویشناک ءِ، پاکستان اٹ رہینگوک آ عیسائی، ہندو، سکھ، پارسی و ایلو مذہب آتا منوک آ پاکستانی ننا راجی تانہ بانہ نا اٹوٹ بشخ ءِ، پاکستان بین المذاہب ہم گرنچی نا مون آدننگ کن غٹ بشخ آتیٹی اقلیت آتا بشخ ہلنگ ءِ ودفنگ کن بھلو کچ اسے آ مثبت گام گیج کرینے۔ برطانوی ہائی کمشنر جین میریٹ پارے کہ برطانیہ ٹی 20 لکھ مسلمان و 17 لکھ ہندو رہینگوک ءُ، پاکستان و برطانیہ بین المذاہب ہم گرنچی نا مون آدننگ کن اسہ ایلو نا آزموندہ غاتیان فائدہ ہرفنگ کیرہ۔ برطانیہ مدرسہ غاتا خوانوک آ طالب علم آتے پوسکن تکنیکی تعلیم، کسب نا فراوانی کن پاکستان ءِ کمکاری نا پیش کش کرینے۔ برطانوی سفیر پارے کہ مدرسہ غاتیان فارغ التحصیل طالب علم آتے برطانیہ ٹی ایکسچینج پروگرام و اسکالر شپ فراوان کننگ کینہ۔ وزیر مذہبی امورپارے کہ مچ آملک اٹی 18 ہزار آن زیات مدرسہ رجسٹرڈ ءُ، اوفتا طالب علم آتے پوسکن تکنیکی تعلیم فراوان کننگ وخت انا اہم گرج ءِ، وزیراعظم یوتھ پروگرام نا رداٹ مدرسہ غاتا طالب علم آتے پوسکن تکنیکی تعلیم وکسب ہیل تننگ انگ ءِ۔ اوڑدہی ٹی انتہاپسندی نا چٹفنگ و بین المذاہب ہم آہنگی ءِ مون آ دننگ کن کمکاری ءِ ودفنگ آ امنا کننگا۔