بنجائی وزیر داخلہ محسن نقوی تون علامہ شاہ اویس نورانی نا اوڑدہی

اسلام آباد۔ 17 اکتوبر(اے پی پی) بنجائی وزیر داخلہ محسن نقوی تون جمعیت علمائے پاکستان نا سیکرٹری جنرل علامہ شاہ اویس نورانی اسلام آباد اٹی اوڑدہی کرے، ہراٹی مذہبی ہم آہنگی، رواداری، ایلمی  و قومی سیوت نا مون آدننگ آ سرجمی اٹ گپ وتران کننگا۔ اوڑدہی ٹی داہیت آ پورو امنا کننگاکہ ملک اٹی پائیدار امن نا قیام و راجی ہم گرنچی کن غٹ مکتبہ فکر ءِ تین پہ تینی کمکاری و مثبت کڑد ادا کروئی مریک۔ وزیرداخلہ محسن نقوی پیدوار کرے کہ اسہ ہم بے گناہ ءُ بندغ اسے نا برخلاف کارروائی کننگپک و اسہ مدرسہ اسے ہم بند کننگپک ولے شرپسند و انتہاپسند زموار آتون سختی اٹ مون تننگک و کانود ءِ دوٹی ہلنگ یا ریاست نا برخلاف سلہہ ہرفنگ نا موکل اسُل تفننگک۔ محسن نقوی پارے کہ قائد اعظم نا پاکستان اٹ شرپسندی، انتہاپسندی و بے چیٹی تالان کروک آتا ہچ ءُ گنجائشت اس اف۔ داوڑنا زموار آتا برخلاف سختی اٹ کارروائی کننگک۔ اوپارے کہ عالم دینک مذہبی ہم گرنچی، صبر و سگ و امن نا مون آ دننگ اٹ اہم کڑد ادا کننگ ءُ و دینی تعلیم ءِ مون آدننگ ننا غٹ انا اسیجائی فرض ءِ۔ علامہ شاہ اویس نورانی داوخت آ پارے کہ جمعیت علمائے پاکستان ملک اٹی امن، رواداری وایلمی نا مون آدننگ کن حکومت تون ہرممکن کمک کیک۔ اوڑدہی ٹی ملک اٹی مذہبی رواداری و قومی یکجہتی نا مون آدننگ کن اسیجائی کوشست آتے برجاتخنگ آ امنا کننگا۔