بنجائی وزیر موسمیاتی بدلی ڈاکٹر مصدق ملک تون سیمسن گروپ نا جہانی سلابتی بورڈ انا اوڑدہی

اسلام آباد۔ 17 اکتوبر (اے پی پی) بنجائی وزیر موسمیاتی بدلی و چاگڑدی ہم گرنچی سینیٹر ڈاکٹر مصدق ملک پارینے کہ پاکستان اٹ سیل و سوات نا مون آ دننگ کن ہندن ءُ گام گیج المی ءِ ہرا قدرتی ندارہ، جنگلات و حیاتیاتی تنوع نا رکھ ءِ پک کرسا ہندی آبادی کن روزگار نا پوسکن ءُ وارخواہی ودی کیر۔ داخیال آتا درشانی ءِ او جمعہ نادے آ سیمسن گروپ آف کمپنیز نا جہانی سلابتی بورڈ اتون اوڑدہی ٹی کرے۔ ڈل انا کماشی ءِ لارڈ عامر سرفراز آف لینسنگٹن ، رکن ہاؤس آف لارڈز (برطانیہ) و جنرل پیٹرک سینڈر مسکوہی سروک برطانوی فوج ءِ کریر۔ اوڑدہی ٹی پاکستان اٹ خاص کر قطبی علاقہ جات اٹی چاگڑدی سیل و سوات(ایکوٹوورازم ) نا مون آ دننگ نا گمان تا بارواٹی سرجمی اٹ گپ وتران کننگا، گپ وتران نا محور ہمو پائیدار شونداری ماڈل آتا ٹہیفنگ ئس ہرا زرگزرانی شونداری و قدرتی چاگڑد نا رکھ انا نیام اٹ توازن ودی کیر۔ ڈاکٹر مصدق ملک پارے کہ پاکستان اٹ سیل و سوات نا مون آ دننگ کن ہندن ءُ گام گیج المی ءِ ہرا قدرتی ندارہ، جنگلات و حیاتیاتی تنوع نا رکھ ءِ پک کرسا ہندی آبادی کن روزگار نا پوسکن ءُ وارخواہی ودی کیر۔ دیوان اٹی سیمسن گروپ نا کنڈآن مچ آملک اٹی تینا کارپوریٹ سوشل ریسپانسبلٹی (سی ایس آر) نا رداٹ 10 کروڑ درخت خلنگ نا عزم انا بابت ہم گپ وتران کننگا۔ بنجائی وزیر دا بھلو کچ اسے آ شجرکاری مہم نا ستاءِ کرسا پارے کہ نجی بشخ انا شمولیت حکومت نا چاگڑدی ہدف آتا دوئی کننگ اٹ اہم کڑد ادا کننگ کیک۔ اوزور شاغا کہ داوڑنا شریداریک پاکستان نا سوز شونداری ایجنڈا ءِ مون آ دننگ و قومی کہول آ جنگلات آتا بحالی و پائیدار شونداری نا ہدف آتا دوئی کننگ اٹ اہم کڑ د ادا کیک۔