آئی ایم ایف تون سٹاف لیول معاہدہ، ریٹنگ ایجنسی تا درجہ بندی ٹی گچینی حکومت نا اصلاحاتی ایجنڈا غا جہانی پت انا ڈیک ءِ، ملک اٹی زرکاری کن سازگار چاگڑد، وارخواہی ساڑی ءِ، بنجائی وزیر خزانہ نا واشنگٹن اٹی اوڑدہی، دود آتیان تران

واشنگٹن۔ 17 اکتوبر (اے پی پی) بنجائی وزیر خزانہ و محصولات سینیٹر محمد اورنگزیب پارینے کہ گچین زرگزرانی نظم ونسق ، مالیاتی و بیرونی سوگوی و اصلاحات نا گچین گام گیج آتیٹی پاکستان نا زرگزران اٹی گچینی بسنے، ملک اٹی زرکاری کن سازگارچاگڑد و وارخواہی ساڑی ءِ، آئی ایم ایف تون سٹاف کہول انا معاہدہ و جہانی ریٹنگ ایجنسی تا کنڈآن پاکستان نا درجہ بندی ٹی گچینی آن حکومت نا اصلاحات نا ایجنڈا غا جہانی پت انا عکاسی مننگ ءِ، ایف بی آر تون اوار زرگزران نا چندی بشخ آتیٹی اصلاحات نا عمل برجاءِ۔ داخیال آتا درشانی ءِ او جہانی مالیاتی ادارہ غاتا کنڈآن اڈ ہلوک سیمینار و دود آتیان تران اٹی کرے۔ جہانی مالیاتی فنڈ و جہانی بینک انا سالانہ دیوان تا وخت آ وزیرخزانہ چین نا نائب وزیرخزانہ لیاؤمِن تون اوڑدہی کرے ہراٹی اقتصادی اصلاحات و ہڑتوم آ کنڈآتا کمکاری آ گپ وتران مس، وزیرخزانہ چینی ہم منصب ءِ زوت آتے اٹ آئی ایم ایف تون طے مروک آ اسٹاف لیول معاہدہ نا بارواٹی معلومدار کرے۔ اوپارے کہ دا معاہدہ حکومت پاکستان نا اقتصادی اصلاحات نا ایجنڈاغا جہانی پت انا درشانی ءِ۔ وزیرخزانہ چین نا مارکیٹ اٹی پانڈابانڈ انا جاری کننگ نا بابت تازہ پیش رفت آن ہم اودے معلومدار کرے۔ اوپاکستان نا نیوڈیولپمنٹ بینک اٹی رکنیت کن چین نا مخ تفی نا درخواست ءِ ہم کرے۔ وزیرخزانہ چین نا نائب وزیرخزانہ ءِ ملک اٹی کاروبار و زرکاری کن سازگار چاگڑد نا فراوانی نا بابت حکومتی گام گیج آتیان معلومدار کرے انفارمیشن ٹیکنالوجی، کشت وکشار، صنعت و معدنیات نا بشخ آتیٹی چینی زرکاری نا خیرمقدم ءِ کرے۔ اوبورڈ میٹنگ آتیٹی پورو کمک فراوان کننگ آ آئی ایم ایف نا ایگزیکٹیو ڈائریکٹر نا دفتر نا منت واری ءِ ہرفے۔