پاکستان نا برخلاف اوغان طالبان نا بلااشتعال جارحیت نا ورندی آ الس نا پاک فوج اتون پبی یکجہتی نا درشان

راولپنڈی۔ 17 اکتوبر (اے پی پی) پاکستان نا برخلاف اوغان طالبان نا بلااشتعال جارحیت نا ورندی آ الس پاک فوج اتون پبی یکجہتی نا درشانی ءِ کرینے۔ اوغان طالبان تا جارحیت و دہشت گردی آ پاکستانی الس نا شدید ردعمل مون آ بننگ ءِ ۔ سرجم حوال آتا رداٹ صوبہ خیبرپختونخوا نا شاریک پاکستان نا فوج اتون پبی یکجہتی نا درشانی ءِ کریر۔ شاریک پارینو کہ پاکستان نا وتواجہی ءِ نسخان تننگ نا کوشست کروک آتا برخلاف پاک فوج پبی ورندی کارروائی کے، شاریک پاریر کہ پاک فوج اوغانی تے جوان ءُ سبخ اس تس و اوفتا چندی پوسٹ آتیا کوزہ کرے۔ اوغان طالبان رجیم نا بلااشتعال جلہو آتا برخلاف پبی ورندی آ پاک فوج ءِ خراج تحسین پیش کینہ، بلوچستان وخیبر پختونخوا نا سیمی علاقہ غاتیا طالبان جلہو کرے ولے ہرجاگہ غا اوفتے شکست مس، بھارت نا ایماآ اوغان طالبان تا جلہو آتے ہرپڑآ پاک فوج شکست نا گواچی کننگ ءِ، پاکستان اوغانستان نا کمکار بھارت ءِ ہم پبی ورندی تس، اوغانستان وار وار آ وعدہ خلافی کیک، او غٹ آن مست دہشت گردی نا نیٹ ورک ءِ چٹفے، اوغانستان اول فتنۃ الخوارج و فتنۃ الہندوستان نا نیٹ ورک ءِ چٹفے، ولدا ہیت مریک۔ ہراتم اسکان دہشت گردی چٹپک ، ہموتم اسکان اوغانستان تون تعلقداری بحال کننگپ ۔ خیبرپختونخوا نا الس پاک فوج اتون ہم کوپہ جنگ تننگ کن ہروخت تیارءِ۔