ایتھوپیا ءَ پنچمی پاکستان ءُ افریقہ ءِ تجارتی دیمروئی کانفرنس ءُ ”میڈ ان پاکستان“ ءِ نمائش ءِ بنگیج کنگ بوتگ، ایشی ءِ تہ ءَ 100 ءَ چہ گیش پاکستانی نامداریں برآمد کنوک ءُ صنعت کار بھر زور اَنت

ادیس ابابا۔17اکتوبر  (اے پی پی): پنچمی پاکستان ءُ افریقہ ءِ تجارتی دیمروئی کانفرنس ءُ میڈ ان پاکستان ءِ نمائش ءِ سرکاری بنگیج جمعہ ءِ روچ ءَ ادیس ابابا ءِ ’’ملمجار ہال‘‘ ءَ کنگ بیت۔ اے باوقاریں مراگش ءِ بندوبست وزارت تجارت، حکومت پاکستان ءُ پاکستان ءِ تجارت ءِ دیمروئی اتھارٹی ءِ نیمگ ءَ ادیس ابابا ءَ پاکستان ءِ سفارت خانہ ءِ کمک ءَ کنگ بوھگ ءَ انت۔ سئے روچی کانفرنس ءُ نمائش ءَ سرجمیں افریقہ ءَ چہ 100 ءَ چہ گیش نامداریں برآمد کنوک، صنعت کار ءُ کاروباری ءُ حکومتی نمائندگ آنی بھر زوری کنگ بوتگ، ایشی ءَ چہ تجارت، سرمایہ کاری ءُ دو نیمگی کمک ءِ دیمروئی ءِ واستہ یک کلیدی پلیٹ فارم ءِ پجارینگ بوتگ۔ مراگش ءِ بنگیج گوں قرآن پاک ءِ تلاوت ءَ بوت، ایشی ءَ پد ایتھوپیا، افریقہ یونین ءُ پاکستان ءِ راجی سوت الہان ​​کنگ بوت۔ ایتھوپیا ءَ پاکستان ءِ سفیر واجہ عاطف شریف ءَ وتی وش اتکی گشتانک ءِ تہ ءَ کانفرنس ءِ ارزشت ءِ سر ءَ زور پر دات ءُ گوشت کہ اے دیوان پاکستان ءِ ’’لوک افریقہ‘‘ ءِ گامگیج ءِ برجاہ اِنت۔ آئی ءَ گوشت کہ ایتھوپیا مشرقی افریقہ ءِ گیٹ وے انت ءُ پاکستان ءِ واستہ تجارتی ءُ اقتصادی سیادی آنی تہ ءَ گیشی ءِ واستہ جوانیں جاھ انت۔ پاکستان ءَ ایتھوپیا ءِ سفیر جمال بکر ءَ دوئیں ملک آنی نیام ءَ گیش بوھوکیں سیادی آناں ساڑات ءُ گوشت کہ پاکستان ءُ ایتھوپیا ءِ نیام ءَ کمک ءُ دوستی ءِ سفر مھکم بوھگ ءَ اِنت، ءُ پی اے ٹی ڈی سی فورم دوئیں ملک آنی کاروباری براتی ءَ را نوکیں موہ ءِ پجارینگ ءَ اَنت۔ ایتھوپیا ءِ درئی کارانی وزارت ءِ ڈائریکٹر جنرل سفیر دیوانو کدزیرے ءَ افریقہ ءِ گوما پاکستان ءِ فعال تجارتی حکمت عملی ءِ توسیپ کت ءُ گوشت کہ ’’پاکستان ءُ ایتھوپیا ءِ سیادی جنوب ءُ جنوب ءِ کمک ءِ مزنیں مثال انت۔‘‘ ٹی ڈی اے پی ءِ ڈائریکٹر جنرل عبدالکریم ممن ءَ پاکستان ءِ برآمداتی کارکردگی ءِ سر ءَ پریزنٹیشن دات ءُ افریقی مارکیٹ آنی تہ ءَ ٹیکسٹائل، فارماسیوٹیکل، انجینئرنگ ءُ زرعی پیداوار آنی شوبگ آنی تہ ءَ موہ آنی سر ءَ چمشانک دات۔ ھاسیں مہمان ایتھوپیا ءِ ٹرانسپورٹ ءُ رسد ءِ وزیر ڈاکٹر علیمو سمیم کاسادا ءَ مراگش ءِ سرکاری رنگ ءَ بنگیج کنان ءَ گوشت کہ ایتھوپیا خطہ ءَ اقتصادی یکوئی ءُ تجارتی آسراتی ءِ دیمروئی ءِ واستہ زبردستیں گامگیج زورگ ءَ انت۔ آئی ءَ گوشت کہ مرچی مچی پاکستان ءُ ایتھوپیا ءِ نیام ءَ تجارتی سیادی آنی تہ ءَ نوکیں باب ءِ بنگیج اِنت۔ وفاقی وزیر تجارت جام کمال خان ءَ وتی گشتانک ءِ تہ ءَ افریقہ ءِ گوما پائیدار اقتصادی سیادی ءِ واستہ پاکستان ءِ عزم ءِ سر ءَ زور پر دات۔ آئی ءَ گوشت کہ ما ایوک ءَ افریقہ ءِ گوما تجارت کنگ ءَ نہ ایں بلکینگ ءَ یکجائی دیمروئی ءُ اجتماعی وشھالی ءِ تہ ءَ شریک آں۔ مراگش ءِ گڈسرا مہمان آنی نیام ءَ یادگاری ڈھال بھر ءُ بانگ کنگ بوت، ایشی ءَ پد ربن ءِ کٹگ ءِ مراگش برجم دارگ بوت۔ وزیر تجارت ءُ اے دگہ مزنیں مردماں نمائش ءِ جتاجتائیں اسٹال آنی سر ءَ تر ءُ تاب کتگ ءُ نمائش کنوک آنی گوما حیال ءُ لیکہ درشان کتگ۔ یک روچی کانفرنس ءِ تہ ءَ پینل ءِ تران، شعبہ ءِ رد ءَ پریزنٹیشن ءُ کاروباری دیوان (بی ٹو ایم) ھوار ات۔ اے مراگش ءَ یوگنڈا، کیپ ٹاؤن، روانڈا، جنوبی سوڈان ءُ تنزانیہ ءَ چہ دہ ءَ چہ گیش افریقی ملکاں بہر زرتگ۔ نمائش ءِ تہا ملک آنی نمائندگ بہر زورگ ءَ انت۔ اولی روچ ءَ سینکڑوں خریداراں جتا جتائیں شعبہ آنی تہ ءَ سک باز دلگوشی ءِ درشانی کتگ وھدے کہ آیوکیں دو روچ آنی تہ ءَ گیشیں کساس ءَ بھر زوری ءِ گمان اِنت۔ 5می پاکستان ءُ افریقہ ءِ تجارتی دیمروئی کانفرنس ءُ مڈل ان پاکستان نمائش پاکستان ءِ افریقہ ءِ گوما وتی اقتصادی ءُ تجارتی سیادی ءَ را گیش مھکم کنگ ءِ عزم ءِ علامت انت، ایشی ءِ بنیات ءَ وت مہ وتی فائدگ، صنعتی کمک ءُ مشترکہ وشھالی ءِ سرا انت۔