سلاہ بندیں ٹی ایل پی ءِ گل ءَ گوں پیشہ وارانہ رنگ ءَ دیم پہ دیم بوھگ ءِ ھاتر ءَ سیکورٹی فورسز ءَ را داد ، مسیتانی مینار ءُ لوگانی باماں چہ تیرگواری کنوکاں کنٹرول کنگ آسان نہ بوتگ ، حکومت ءَ زھرشانی ءَ پیسر گپ ءُ تران کنگ ءِ کوشست کتگ ءُ گڈی ساھت ءَ تاں وزیر داخلہ محسن نقوی

اسلام آباد۔16اکتوبر  (اے پی پی):وفاقی داخلہ ءِ وزیر محسن نقوی ءَ سلاہ بندیں گل ءَ گوں پیشہ وارانہ رنگ ءَ دیم پہ دیم بوھگ ءِ ھاتر ءَ سیکورٹی فورسز ءَ را شگر ءُ منت گپت ءُ گوشت کہ مسیت آنی مینار ءُ لوگ آنی بام ءَ چہ براہ راست تیر گواری کنوکیں مردمانی کنٹرول کنگ آسانیں کارے نہ بوتگ۔ سرکار ءَ ٹی ایل پی ءِ زھرشانی ءِ بندات ءَ پیسر ھرچ وڑیں جھد کتگ ءُ تاں گڈی ساھت ءَ بلے ٹی ایل پی ءَ کوش ءُ ناشرکاری ءِ تہ ءَ ھواریں مردمانی یلہ کنگ ءِ لوٹ برجاہ داشتگ۔ سرکار ٹی ایل پی ءِ کارندہاں ابید دگہ کس ءِ ھلاپ ءَ کارروائی نہ کنت۔ من ءَ بُگش اِت کہ اے زھرشانی پہ فلسطین ءِ یکوئی ءَ بوتگ یا ناشرکارانی رکّینگ ءِ ھاترا؟ آئی ءَ پنچ شمبے ءِ شپ ءَ وزارت داخلہ ءَ مذہبی امور ءِ وفاقی وزیر سردار یوسف، وفاقی وزیر اطلاعات ءُ نشریات عطا اللہ تارڑءُ داخلہ ءِ وزیر مملکت طلال چوہدری ءِ گوما پریس کانفرنس ءَ گوں گشتانک دیگ ءَ ات۔ وزیر داخلہ محسن نقوی ءَ گشتگ کہ آ کہ گش انت کہ گپ ءُ تران نہ بوتگ من آہاں گشگ لوٹاں کہ آہانی سڑکاں آیگ ءَ پیسر ہم گپ ءُ تران بندات بوتگ ات کہ ایشی ءِ تصدیق ٹی ایل پی ءِ مزنیں کارندہ وت کت کن انت۔ آئی ءَ گوشت کہ سرکار ءَ آھاں ھر رند ءَ گْوشتگ کہ پد ءَ برو اِت، آھانی ھلاپ ءَ ھچ وڑیں کارروائی کنگ نہ بیت بلے آھانی لوٹ ھر رند ءَ گیش سخت بوتگ اَنت۔ وزیر داخلہ ءَ گشتگ کہ ٹی ایل پی ءِ مردماں جست کنگ بہ بیت کہ آیا قاتل ءُ ناشرکارانی درکنگ ءِ لوٹ فلسطین ءِ سبب ءِ بہر بوتگ؟ آئی ءَ گوشت کہ "لبیک یا رسول اللہ” ایوک ءَ آوانی نعرہ نہ انت بلکیں مئے درستانی نعرہ انت۔ محسن نقوی ءَ گشتگ کہ آ روچ ءَ کس ءَ گوں بے وسی زوراکی کنگ نہ بوتگ، ایوک ءَ ہما مردم کہ سلاہ بند بوتگ انت ءُ تیر گواری دارگ بوتگ انت۔ آئی ءَ گْوشتگ کہ پولیس ءَ ھر وڑ ءَ راہ ءُ در ءِ ھلاس کنگ لوٹ اِتگ ءُ سرجمیں سیکورٹی فورسز ستا ءِ مستحق اَنت پرچا کہ اے سلاہ بندیں گل ءِ کنٹرول کنگ آسان نہ بوتگ، لھتے مردم چہ مسیتانی مینار ءُ لوگانی باماں تاں سیکورٹی فورسز ءِ سر ءَ دیم پہ دیم تیرگواری کنگ ءَ اِت اَنت۔ ملک ءِ یک مزنیں مذہبی ءُ سیاسی مردمے ءَ میانجی داری ءِ کوشست کتگ بلے ٹی ایل پی ءَ ہم آئی ءَ را دھوکہ داتگ۔ آئی ءَ گوشت کہ اے گپ ءِ سرپد بوھگ المی اِنت کہ ملک ءَ ھر 15 روچ ءَ پد پرچا یک یا دومی مزنیں زھرشانی تیار کنگ بیت، وھد ءِ گوزگ ءَ گوں اے گپ پدر بیت کہ آ گوں کسے یا دومی ءَ دیم پہ دیم یا بالواسطہ سیادی دار اَنت۔ پرامنیں زھرشانی ھمک مردم ءِ ھک اِنت بلے سلاہ بند ءُ زوراکیں زھرشانی ءِ موہ دیگ نہ بیت ۔ وزیر داخلہ ءَ گوشت کہ حکومت ءِ گور ءَ ویڈیو شواہد است انت کہ ایشی ءِ تہ ءَ اے گپ پدر گندگ بیت کہ ٹی ایل پی ءِ کارندہ آناں بندوق ءِ نشانگ ءَ گاڑی زرتگ ءُ زھرشانی ءَ ھوار بوتگ انت۔ گڈسر ءَ آئی ءَ گوشت کہ جمعہ ءِ روچ ءَ (باندا) پاکستانی الس فلسطینی آں وتی ھک ءِ گرگ ءِ پد ءَ وتی منت واری ءِ درشان ءَ کنت۔ آئی ءَ وزیر دینی امور ءُ عالماں دلجمی دات کہ ٹی ایل پی ءِ کارندہ آں ابید ہچ مدرسہ ءُ دینی عالم ءِ حلاف ءَ ہچ وڑیں کارروائی کنگ نہ بیت۔