وزیربحری امور جنید انوار چوہدری تون سوڈانی سفیر نا اوڑدہی

اسلام آباد۔ 16 اکتوبر (اے پی پی) پاکستان سوڈان نا بندرگاہ تا جدیدیت اٹی تکنیکی کمک فراوان کننگ نا سلہ خلسا اونا بحری پنجر ءِ اپ گریڈ کننگ و ڈیہہ اٹی واپاری رابطہ غاتے سوگو کننگ نا عزم انا درشانی ءِ کرینے۔ دا سلہ ءِ بنجائی وزیر بحری امور محمد جنید انوار چوہدری سوڈان نا سفیر صالح محمد احمد محمد صدیق تون اوڑدہی ٹی کرے۔ وزارت آن جاری اعلامیہ نا رداٹ اوڑدہی ٹی بحری شونداری، بندرگاہ تا جدیدکاری، لاجسٹک نظام نا گچینی و صنعتی ڈٹ آتیٹی کمکاری نا امور نا بارواٹی گپ وتران کننگا۔ سوڈانی سفیر پارے کہ خرطوم پاکستان نا بندرگاہ تتون براہ راست شپنگ لائن قائم کننگ نا خواہندار ءِ تانکہ ہڑتوم آ ملک آتا نیام اٹ واپاری و لاجسٹک رابطہ غاک پین سوگو مننگ کیر۔ اوپارے کہ اسہ مخصوص شپنگ روٹ اسے آن دے ٹکی افریقہ، دے ٹک نیامی و سویلی ایشیانا نیام اٹ سپلائی چین ءِ گچین کننگ و ہن و بر نا خڑچ آتے کم کننگ اٹ کمک رسینگک۔ اوناپاننگ ئس کہ منہ غیر کرکی افریقی ملک ہرافتے ٹی چاڈ، نیامی افریقی جمہوریہ، ایتھوپیا و یوگنڈا اوار ءُ، جہانی واپار اسکان رسینگ کن سوڈان نا بحریہ احمر آ واقع بندرگاہ خاص کر پورٹ سوڈان آ سیبو کیرہ۔ بنجائی وزیر جنید انوار چوہدری سوڈان نا سلاہ نا خیرمقدم ءِ کرساپارے کہ پاکستان بندرگاہ تا جدید کاری ٹی سوڈان نا کمک کن تیار ءِ ۔ اوپارے کہ پاکستان زوت آتے اٹ نیشنل آرٹیفیشل انٹیلی جنس پالیسی 2025ء منظور کرینے ہرانا رداٹ وزارت بحری امور پاکستانی بندرگاہ تا انتظام اٹی پوسکن ٹیکنالوجی ءِ اوار کننگ ءِ۔