بنجائی وزیر داخلہ محسن نقوی تون آسٹریلوی ہائی کمشنر نا اوڑدہی، کوسٹ گارڈز، بارڈر مینجمنٹ و انسانی اسمگلنگ نا توننگ کن کمکاری ءِ پین گچین کننگ آ امنا

اسلام آباد۔ 16 اکتوبر (اے پی پی) بنجائی وزیر داخلہ محسن نقوی تون آسٹریلیا نا ہائی کمشنر نیل ہاکنز داڑے اوڑدہی کرے ہراٹی پاک آسٹریلیا تعلقداری، تین پہ تینی کمکاری نا مون  آدننگ و چندی بشخ آتیٹی شریداری عمل ءِ ودفنگ آ سرجمی اٹ گپ وتران مس۔ اوڑدہی ٹی کوسٹ گارڈز، بارڈرمینجمنٹ و انسانی اسمگلنگ نا توننگ کن کمکاری ءِ پین گچین کننگ آہم امنا کننگا۔ آسٹریلوی ہائی کمشنر دہشت گرد جلہو و ساڑی آ ناخوشگوار واقعہ غاتیٹی پولیس آفیسر تون اوار سیکورٹی فورس آتا کارندہ غاتا شہیدی آ ڈکھیائی و است ہسونی نا درشانی ءِ کرے۔ ہائی کمشنر نیل ہاکنز وزیرداخلہ محسن نقوی نا کماشی ٹی اسلام آباد نا آسودہی و شونداری ڈٹ آتا بناءِ کرسا پارے کہ دافتیان شار اٹی نمان گچینی بسنے۔ اوقذافی اسٹیڈیم نا زیبائی  بحالی نا ہم ستاءِ کرے وپارے کہ پاکستان اٹی گدریفوک آ وخت یات گار ءِ وخت اس کہ لاہور اٹی دربار بی بی پاک دامن اونا پسندیدہ جاگہ ءِ۔ نیل ہاکنز پارے کہ ساڑی آ دور اٹی پاکستان نا جہانی وقار و ہند نمان وڑاٹ ودانے۔ داوخت آ وزیرداخلہ محسن نقوی پارے کہ پاکستان غیرکانودی امیگریشن نا حوصلہ شکنی و کانودی امیگریشن نا مون آ دننگ آ یخین تخک۔ غیرکانودی وڑاٹ پیشن نا ملک آ ہنوک آ بندغ آتے وطن آ پدی بننگ آ سخت کانودی کارروائی تون مون تروئی تمک۔ اوپیدوار کرے کہ انسانی اسمگلنگ اٹی اوار زموار آتون سختی اٹ مون  تننگ انگ ءِ۔ وزیرداخلہ ہڑتوم آکنڈآتا تعلقداری نا مون آدننگ اٹ آسٹریلوی ہائی کمشنر نیل ہاکنز نا کوشست آتا ستاءِ کرسا اونا آخبت کن نیک است خواہی نا درشانی ءِ کرے۔ داوخت آ وزیرمملکت طلال چوہدری، بنجائی سیکرٹری داخلہ خرم آغا و آسٹریلوی ہائی کمیشن نا بڑزکو کمامدارآک ہم ساڑی ئسر۔