اسپیکر قومی اسمبلی نا ایم این اے مبارک زیب انااُراغا جلہو نا مذمت

اسلام آباد ۔ 16 اکتوبر (اے پی پی) اسپیکر قومی اسمبلی سردار ایاز صادق قومی اسمبلی نا باسک مبارک زیب انا اُراغا جلہو نا ترند انگا لوز آتیٹی مذمت ءِ کرسا غٹ خاہوت کن نیک است خواہی نا درشانی ءِ کرینے۔ پنچ شنبے نادے آ تینا اسہ مذمتی بیان اسے ٹی اوپارے کہ اللہ تعالیٰ نا شکر ءِ کہ جلہو اٹی ہچ ءُ جونی نسخان اس متنے۔ اسپیکر قومی اسمبلی مبارک زیب تون ہمدردی و یکجہتی نا درشانی ءِ کرے و پارے کہ السی نمائندہ غاتیا جلہو جمہوریت و آئین نا روح آن چپ ءِ۔ اسپیکر کانود نافذ کروک آ ادارہ غاتے جلہو اٹی اوار زموار آتے دمدستی دزگیرکننگ و سیکورٹی ادارہ غاتے واقعہ نا شفاف و بے کنڈ ہلوک جاست وپاست نا پارت کرے۔ اسپیکر کانود نافذ کروک آ ادارہ غاتے زہمی خاہوت ءِ پورو رکھ فراوان کننگ نا گرج آ زور شاغا و پارے کہ السی نمائندہ و اوفتا خاہوت نا سیکورٹی ریاست نا زمواری ءِ۔ ننے سگ، رواداری و جمہوری قدر ءِ مون آدننگ نا گرج ءِ۔ ریاست داوڑنا زموار آتے کانود نا گرفت اٹی اتے ہرا بے چیٹی و نزوری تالان کننگ خوارہ۔