وفاقی وزیر خزانہ محمد اورنگزیب ءَ واشنگٹن ڈی سی ءَ ھاسیں دیوان ءُ مراگشاں گوں تران کنان ءَ پاکستان ءِ کریڈٹ ریٹنگ ءِ تہ ءَ گہتری ، کاروباری برادری ءِ اعتماد ءِ تہ ءَ مزنیں گیشی ءُ سرمایہ کاری ءِ موہ آنی سر ءَ چمشانک

اسلام آباد۔16اکتوبر  (اے پی پی): وفاقی وزیر برائے مالیات ءُ آمدنی محمد اورنگزیب ءَ امریکی دارالحکومت واشنگٹن ڈی سی ءَ ھاسیں دیوان ءُ مراگش آنی تہ ءَ گشتانک دات، ایشی ءِ تہ ءَ پاکستان ءِ کریڈٹ ریٹنگ ءِ تہ ءَ گہتری، کاروباری برادری ءِ اعتماد ءِ تہ ءَ مزنیں گیشی ءُ سرمایہ کاری ءِ موہ آنی سر ءَ زور پر دات۔ آئی ءَ پاکستان ءُ سعودی عرب ءِ نیام ءَ گیش بوھوکیں بیپاری ءُ سرمایہ کاری سیادی ءَ را وش اتک کت ءُ پاکستان ءَ بنیاتی کوکا  منصوبگ آنی تہ ءَ سرمایہ کاری کنگ ءِ سعودی واھشت ءِ درشان کت ءُ گوشت کہ موسمی برجائی ءُ بنیاتی ڈھانچگ ءِ دیمروئی ءِ واستہ وام ءِ گہتریں انتظامی، تکنیکی گنجائش ءِ تہ ءَ گیشی ءُ پائیدار مالیاتی وسیلگ آناں رسائی المی اِنت۔ وفاقی وزیر خزانہ ءُ آمدنی محمد اورنگزیب ءَ واشنگٹن ڈی سی ءَ وتی سعودی ھمکار  محمد عبداللہ عبدالعزیز الجدعان  ءِ گوما یک ھاسیں گند ءُ نند ءِ برجم داشتگ ات۔ اے موہ ءِ سر ءَ آئی ءَ دوئیں ملک آنی نیام ءَ گیش بوھوکیں تجارتی ءُ سرمایہ کاری سیادی آنی سر ءَ زور پر دات۔ آئی ءَ وتی سعودی ھمکار ءَ را راجی ایئر لائن پی آئی اے ءُ بالی پٹ آنی نجکاری ءِ ھوالگ ءَ پیشرفت ءِ بابت ءَ سرپد کت ءُ پاکستان ءَ نجی سرمایہ کاری ءِ دیمروئی ءِ ھوالگ ءَ گپ ءُ تران کت۔ نجی سرمایہ کاری ءِ دیمروئی ءِ واستہ انٹرنیشنل مانیٹری فنڈ ءُ کثیر جہتی سرمایہ کاری گارنٹی ایجنسی ءِ ھاسیں کرد ءِ سر ءَ ھم گپ ءُ تران کنگ بوت۔ وزیر ھزانگ محمد اورنگزیب ءَ پاکستان ءَ بنیاتی ڈھانچہ ءِ منصوبگ آنی واستہ سعودی کمک ءِ واھشت ءِ درشانی کت۔ وزیر ءِ ھزانگ ءَ آئی ایم ایف پروگرام ءِ چیر دستی ءَ اصلاحاتی ایجنڈا ءِ تہ ءَ سدک بوھگ ءِ جزم ءِ درشان کت۔ وزیر خزانہ ءَ امریکی انٹرنیشنل ڈویلپمنٹ فنانس کارپوریشن ءِ سروک بنجامین بلکی ءَ گوں گند ءُ نند کتگ۔ گند ءُ نند ءِ تہ ءَ امریکا ءِ گوما سرمایہ کاری سیادی ءَ را گیش مھکم کنگ ءِ بابت ءَ گپ ءُ تران کنگ بوت۔ وزیر ءِ ھزانگ ءَ پاکستان ءَ تیل ءُ گیس، کان کنی، کشت ءُ کشاری، آئی ٹی ءُ دواسازی ءِ شوبگ آنی تہ ءَ سرمایہ کاری ءِ مزنیں موہ آنی سر ءَ زور پر دات۔ آئی ءَ گوشت کہ دوئیں ملک آنی حکومت آنی نیام ءَ بیپار ءُ سرمایہ کاری ءِ دیمروئی ءِ سر ءَ تپاکی است انت۔ وزیر خزانہ ءَ ڈی ایف سی ءِ نیمگ ءَ پاکستان ءَ سرمایہ کاری ءِ واستہ جندی شوبگ ءِ دلچسپی ءِ سر ءَ زور پر دات۔ وزیر خزانہ محمد اورنگزیب ءَ وامدار فورم ءِ گول میز ءِ تران ءَ بہر زورگ ءِ ساھت ءَ چاگردی شوبگ آنی تہ ءَ وام ءِ پچ گرگ ءُ سرمایہ کاری ءِ تہ ءَ توازن ءِ سر ءَ زور پر دات۔ آئی ءَ فورم ءِ برجم دارگ ءَ را اجتماعی گامگیج، زانت ءِ تبادلہ ءُ پالیسی ءِ ہمگرنچی ءِ ھاتر ءَ جوانیں گامگیج لیک اتگ۔ آئی ءَ قرضہ ءِ جوانیں انتظام ءِ ضلورت، تکنیکی گنجائش ءِ تہ ءَ گیشی ءِ ضلورت ءِ سر ءَ زور پر دات ءُ آئی ءَ مالیاتی استحکام ءُ غیر مالیاتی بنیاتی ڈھانچہ ءِ دیمروئی ءِ واستہ پائیدار مالیاتی وسیلگ آناں رسائی ءِ ضلورت ءِ سر ءَ زور پر دات۔ وزیر خزانہ محمد اورنگزیب ءَ آذربائیجان ءِ اولی نائب وزیر خزانہ انار کریموف  ءَ گوں ھم گند ءُ نند کتگ۔ گند ءُ نند ءِ ساھت ءَ آئی ءَ دوئیں ملک آنی نیام ءَ مھکمیں اقتصادی ءُ اسٹریٹجک سیادی آنی سر ءَ دل یکیمی ءِ درشان کت۔ وزیر ءِ ھزانگ ءَ آذربائیجان ءَ را سی او پی   ءِ سوبمندیں برجم دارگ ءِ سر ءَ مبارکی دات آئی ءَ پاکستان ءُ آذربائیجان ءِ ترجیحی تجارتی معاہدہ ءُ ٹرانزٹ تجارتی معاہدہ ءَ را دو نیمگی تجارت ءَ را دیم ءَ برگ ءِ واستہ مھکمیں گامگیج لیک اِت۔ اے معاہدہ آں چہ روایتی چیز چوشکہ تل ءُ چاول ءَ چہ ابید ٹیکسٹائل، دوائی، کیمیکل، مشینری ءُ زرعی چیز آنی تہ ءَ تجارت ءَ را گیش کنگ بیت۔ ھزانگ ءِ وزیر ءَ پاکستان بینک فنڈ سٹاف ایسوسی ایشن ءِ باسک آنی گوما ھم گند ءُ نند کت۔ وزیر ءِ ھزانگ ءَ انجمن ءَ را پاکستان ءَ کان کنی، زر ءُ زر ءِ شوبگ ءَ گوستگیں وھد ءَ پیشرفت ءِ بابت ءَ سرپد کت۔ آئی ءَ بھمک زوروک آناں پاکستان ءِ گہتر بوھوکیں کریڈٹ ریٹنگ ءُ ایشی ءِ جوانیں آسر آناں سرپد کت۔ وتی کلوہ ءِ تہ ءَ وزیر ءِ ھزانگ ءَ پاکستان ءِ ڈسپلن، توانائی، اصلاحات، نجکاری، چاگردی سلامتی ءُ سبز ءُ ھواریں دیمروئی ءِ واستہ پاکستان ءِ جزم ءِ یک رندے پدا گوشت۔ وزیر خزانہ ءَ کثیر جہتی سرمایہ کاری ءِ ضمانت ءِ ادارگ (میگا) ءِ ایگزیکٹو نائب صدر ہیروشی ماتانو ءَ گوں گند ءُ نند کت۔ آئی ءَ برجاھیں ثالثی کارروائی ءِ تہ ءَ کمک ءِ واستہ میگا ءِ منت گپت ءُ سرمایہ کار آنی اعتماد ءُ راجی مفاد ءِ رکھینگ ءِ واستہ پاکستان ءِ عزم ءِ پدا زور دات۔ وزیر ءِ ھزانگ ءَ میگا ءِ نیمگ ءَ پیش کرتگیں کسانیں مدتی تجارتی مالیاتی آسراتی منصوبگ پیش کت۔ مجوزہ منصوبگ ءِ وسیلگ ءَ وردن، کھاد، توانائی ءُ المی مشینری ءِ درآمد ءِ واستہ کمک رس ایت۔ وزیر خزانہ ءَ منصوبگ ءِ وھد ءُ پاس ءِ سر ءَ عمل کنگ ءِ سر ءَ زور پر دات۔ وزیر ءِ ھزانگ ءَ سٹینڈرڈ چارٹرڈ بینک ءِ سینئر مینجمنٹ ءَ گوں گند ءُ نند کتگ ءُ پاکستان ءُ بینک ءِ نیام ءَ گیشیں وھد ءِ شریکداری ءَ را ساڑاتگ۔ گپ ءُ تران ءِ ساھت ءَ آئی ءَ میاں اوستمانی ریٹنگ ایجنسی آنی نیمگ ءَ پاکستان ءِ اقتصادی اصلاحات آنی سر ءَ دل یکیمی ءِ ذکر کت۔ آئی ءَ پانڈا بانڈز ءِ جاری کنگ ءُ آیوکیں یورو بانڈز ءُ میاں اوستمانی سکوک ءِ وسیلگ ءَ سرمایہ کاری مارکیٹ آنی تہ ءَ سر بوھگ ءِ منصوبگ آنی سر ءَ تران کت۔ گند ءُ نند ءِ تہ ءَ تجارتی فنانسنگ ءِ آسراتی آنی بابت ءَ ھم گپ ءُ تران کنگ بوت ءُ وزیر ھزانگ ءَ بینک ءَ را گیش تجویز پیش کنگ ءِ لوٹ کت۔ اورنگزیب ءَ ’آب و ہوا ءِ کارروائی ءِ واستہ وزیرانی مالیات ءِ کونسل‘ ءِ دیوان ءَ بہر زرتگ۔ آئی ءَ برطانیہ ءِ نامداریں معاشیات زانت اسٹیفن ڈرکن ءَ گوں ھم گند ءُ نند کتگ ءُ وال اسٹریٹ جرنل ءِ گوما میڈیا ءِ گپ ءُ تران ءَ ھم بھمک زرتگ۔ گند ءُ نند ءِ یک مصروفیں روچ ءِ گڈ ءَ وزیر خزانہ اورنگزیب ءَ واشنگٹن ءَ پاکستان ءِ سفیر رضوان سعد شاخی ءِ نیمگ ءَ پاکستان ہاؤس ءَ برجم داشتگیں شپ ءِ ورگ ءِ تہ ءَ پاکستان ءِ نامداریں کاروباری مردم آنی گوما گند ءُ نند کت۔ وزیر خزانہ ءَ ملک ءِ اقتصادی جاور ھال آنی بابت ءَ بھمک زوروک آناں سرجمیں بریفنگ دات، ایشی ءِ تہ ءَ اقتصادی استحکام ءُ ڈھانچہ ءِ اصلاحات ءِ آسراتی ھوار اَنت۔ آئی ءَ گوشت کہ حکومت ریگولیٹری عمل ءَ را آسان کنگ، ٹیکس ءِ نظام ءَ را گہتر کنگ ءُ توانائی، سرکاری ادارگ ءُ نجکاری ءِ ھوالگ ءَ جیڈھ آنی گیواری ءِ سر ءَ دلگوشی دیگ ءَ انت۔ وزیر ءِ ھزانگ ءَ مراگش ءَ بھمک زوروک آناں میاں اوستمانی ریٹنگ ایجنسی آنی نیمگ ءَ پاکستان ءِ کریڈٹ ریٹنگ ءِ تہ ءَ گہتری ءُ کاروباری برات ءِ اعتماد ءِ تہ ءَ مزنیں گیشی ءِ بابت ءَ ھم سرپد کت۔ آئی ءَ معیشت ءِ استحکام ءُ چاگردی بدلی ءِ چیلنج آنی گیواری ءِ واستہ انٹرنیشنل مانیٹری فنڈ ءُ ورلڈ بینک ءِ برجاھیں کمک ءِ ساڑات۔ واجہ اورنگزیب ءَ پاکستانی کاروباری براتی ءَ را پاکستان ءُ امریکہ ءِ اقتصادی سیادی ءَ را گیش مھکم کنگ ءِ واستہ سوج ءُ پنت پیش کنگ ءِ دعوت دات۔ شریکیں مردماں حکومت ءِ اقتصادی وژن ءِ سرا عمل کنگ ءِ تہا سرجمیں کمک ءِ یقین دہانی دات۔