پیہن آ چھڑی خننگ کپروک بندغ آتا تینا نت تیا سلنگ و پتداری نا چیدہ ءِ، اسپیکر قومی اسمبلی

اسلام آباد ۔ 15 اکتوبر(اے پی پی) اسپیکر قومی اسمبلی سردار ایاز صادق پارینے کہ پیہن چھڑی خننگ کپروک بندغ آتا تینا نت تیا سلنگ و پتداری نا چیدہ ءِ۔ پیہن چھڑی نا جہانی دے انا وخت آ تینا کلہو اٹی اوخننگ کپروک بندغ آتے خراج تحسین پیش کرساپارے کہ دا بندغ آک راج انا فعال و خواری کش تپہ نا نمائندگی ءِ کیرہ، اوفتا لائخی تے کاریم اٹ اتسا اوفتے راج انا فعال شاری جوڑکننگ مریک۔ اوپارے کہ خننگ کپروک بندغ آتیکن تعلیم، روزگار و آسراتی تا فراوانی اجتماعی زمواری ءِ، پارلیمان دابندغ آتا حق انا رکھ اکن گچین کانود سازی کننگ کن سنبرینگوک ءِ۔ اوپارے کہ قومی اسمبلی خننگ کپروک بندغ آتیکن آئین پاکستان ءِ بریل رسم الخط اٹی شینک کرے، اسمبلی نا ویب سائٹ ءِ خننگ کپروک آ بندغ آتیکن رسینگ نا قابل جوڑ کننگانے، پوسکن آ ٹیکنالوجی و کسبکاری نا تربیت خننگ کپروک بندغ آتا وتواجہی کن المی ءِ۔ اونا پاننگ ئس کہ حکومت و نجی بشخ خننگ کپروک ورناتے کن روزگار نا وارخواہی فراوان کیر، دا بندغ آک ملک و قوم انا نہادی سرمایہ ءُ۔ اوپارے کہ پیہن چھڑی نا دے خننگ کپروک بندغ آتیکن است بڈی و قومی عزم انا پوسکنی نا دے ءِ۔