دنیا بھارت ءِ سیم آن ایپار دہشت گردی نا حقی دروشم و علاقائی نزوری نا مرکز امنا کیک، ہرجاحیت نا ورندی ءِ ترند، فیصلہ کن و شدید وڑاٹ تننگک، آئی ایس پی آر

راولپنڈی۔ 15ا کتوبر (اے پی پی) پاک فوج انا شعبہ تعلقات عامہ (آئی ایس پی آر) پارینے کہ دنیا بھارت ءِ سیم آن ایپار دہشت گردی نا حقی دروشم و علاقائی نزوری نا مرکز امنا کیک، ہرجارحیت نا ورندی ءِ ترند، فیصلہ کن و شدید وڑاٹ تننگک۔ چارشنبے نادے آ جاری بیان اٹی پاننگانے کہ معرکہ حق انا 5 تُو گدرینگ انگ آن پد ہم بھارتی ریاست بہار و دیکی بنگال اٹی اسمبلی گچین کاری مہم نا رداٹ بھارتی فوجی سرکڑدہ ہمو روایتی ، من گھڑت و اشتعال انگیز پروپیگنڈا غاتے دہرائفنگ ءِ ہرافتے او ریاستی گچین کاری آن مست دہرائفنگ نا بناءِ کیک۔ آئی ایس پی آر نا رداٹ اسہ ایٹمی واک اسے نا فوجی سرکڑدہ نا سیاسی زور اٹی برسا غیرزموارانہ بیان جاری کننگ بھاز است ہسونی نا ہیت اسے۔ دا دروغ انا بیانک بھارتی الس و جہانی برادری نا مون آ بھارتی عسکری مشین ءِ مزاح نا شست کرینو۔ بیان اٹی پاننگانے کہ ہر پروفیشنل سپاہی دا چاہک کہ بے گرج گھمنڈ و شہرت کن غیرمناسب بیانک جنگی حالیت ودی کننگ کیرہ، ہرا سویلی ایشیانا امن و سوگوی کن بھلو نتیجہ اس ودی کننگ کیرہ ۔ بھارتی فوجی پریس ریلیز اٹی ساڑی تضاد آک ہنداخہ در پیدوار ءُ کہ اوفتا ورندی ءِ تننگ جوان اف۔ بھارتی سرکڑدہ تاریخ ءِ تینا من پسند دروشم اس تننگ نا کوشست کننگ ءِ وبے بنداو فلمی مناظر ترتیب تننگ ءِ۔ داڑآن دا ظاہرمریک کہ بھارتی فوجی و سیاسی سرکڑدہ دا امنا کننگ آن قاصر خننگرہ کہ معرکہ حق اٹی اوفتے فیصلہ کن شکست مس و اونا غلط بیانی بے نقاب مسنے۔ دنیا بھارت ءِ سیم آن ایپار دہشت گردی نا حقی دروشم و علاقائی نزوری نا مرکز امنا کننگ بناکرینے، ہرامہم جوئی و غلبہ پسند پالیسی تیا عمل کننگ ءِ و ہرانا نسخان اونا تینا الس و ہمسایہ ملک  ہڑتوم آتے سرمننگ ءِ۔ آئی ایس پی آر نا رداٹ پاکستانی قوم و اونا سلہہ بند فوج ملکی سالمیت نا دفاع کن پورووڑاٹ اہل و مصمم عزم تخرہ، ہر جارحیت نا ورندی ءِ ترند، فیصلہ کن و شدید انداز اٹی تننگک ، ہرابروک آ چین تسکان یات سلک۔