پاک سعودیہ تزویراتی شریداری ستاکڑزک، ایلم ملک ایم 6 موٹروے، ایم ایل ون، سکل ڈویلپمنٹ و انفارمیشن ٹیکنالوجی نا بنداوی پنجر نا ڈٹ آتیٹی ہم شمولیت کے، وزیر خزانہ محمداورنگزیب

اسلام آباد۔ 15 اکتوبر (اے پی پی) بنجائی وزیر خزانہ ومحصولات سینیٹر محمد اورنگزیب پاکستان و سعودی عرب نا نیام اٹ تزویراتی شریداری نا ستاءِ کرسا ایم 6 موٹروے، ایم ایل ون، اسکل ڈویلپمنٹ و انفارمیشن ٹیکنالوجی نا بنداوی پنجر نا ڈٹ آتیٹی سعودی عرب نا شمولیت نا گرج آ زور شاغانے۔ اوداہیت ءِ تدوک آ دے واشنگٹن ڈی سی ٹی جہانی بینک و جہانی مالیاتی فنڈ انا سالانہ دیوان تا وخت آ سعودی فنڈ شونداری نا چیف ایگزیکٹیو آفیسر سلطان عبدالرحمان المرشدتون اوڑدہی ٹی پارے۔ وزیرخزانہ پاکستان و سعودی عرب نا نیام اٹ سٹریٹجک شریداری نا ستاءِ کرے و سعودی عرب نا کنڈآن تیل انا موخر ادائیگی نا آسراتی آ منت واری نا درشانی ءِ کرے، اوپین کمکاری کن حیدرآباد۔ سکھرموٹروے(ایم6)، ایم ایل ون، سکل ڈویلپمنٹ و آئی ٹی انفراسٹرکچر نا ڈٹ آتیٹی سعودی عرب نا شمولیت نا درخواست کرے و ڈیجیٹل پاکستان ایجنڈا کن سعودی فنڈ انا مخ تفی نا ستاکڑزوک گوندا۔ وزیرخزانہ امریکی صدر نا کمکار جہانی زرگزرانی امور ایموری کاکس، سینئر ڈائریکٹر سویلی و نیامی ایشیا ریکی گل و وائٹ ہاؤس کونسل آف اکنامک ایڈوائزرز نا قائم مقام چیئرپرسن پیری یارڈ تون سرجمی اٹ اوڑدہی کرے۔ اوجولائی ٹی امریکی سیکرٹری واپار ہاورڈ لُٹنک و یو ایس ٹی آر سفیر سارہ گریئر تون تینا اوڑدہی تا حوالہ ءِ ترساپارے کہ واپار نا پڑ اٹی مون آ بروک امنائی سلاہ ءِ جوان زرگزرانی شریداری ٹی بدل کننگ نا گرج ءِ۔ اوڑدہی ٹی توانائی، معدنیات، کشت وکشار، ٹیکنالوجی و ڈیجیٹل میرات آتا بشخ آتیٹی زرکاری نا گمان تابارواٹی گپ وتران کننگا۔ وزیرخزانہ پاکستان اٹ بشام نا پِرتا سوب نوکاپ آن مروک آ نسخان تیا امریکہ نا کنڈآن ہمدردی آ منت واری ءِ ہم ہرفے۔ جہانی مالیاتی فنڈ انا ڈپٹی منیجنگ ڈائریکٹر نائیجل کلارک تون اوڑدہی ٹی وزیرخزانہ پروگرام نا رداٹ پاکستان نا کارکڑد نا ستاءِ کرسا منت واری ءِ ہرفے و داعزم انا درشانیءِ کرے کہ حکومت سوگوی و اصلاحات نا برجاعمل ءِ برقرار تخک۔