صدر ءَ اوگان سرزمین ءَ چہ سرحد ءِ سرا اُرش ءِ مذمت کتگ

اسلام آباد۔15اکتوبر  (اے پی پی): صدر آصف علی زرداری ءَ اوگان سرزمین ءَ چہ سرحد ءِ سرا اُرش آنی سک باز مذمت کتگ ءُ گوشت کہ اوگان سرزمین ءَ چہ اُرش پاکستان ءِ وت واجھی ءِ ھاسیں ھلاپ ورزی اِنت۔ چار شمبے ءِ روچ ءَ صدارتی ایوان ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءَ سلاہ بندیں اُرد آنی جرات ءُ جنگی مہارت آناں شگر ءُ منت درشان کتگ ءُ گوشت کہ اوگان طالبان حکومت مُدام دوحہ ءِ منوگری ءِ ھلاپ ورزی کنگ ءَ اِنت۔ آئی ءَ گوشت کہ اوگان طالبان ناشرکار آناں ایمنیں پناہ گاہ جوڑ کنگ ءَ انت کہ دمگ ءِ ملک آنی واستہ ھترہ جوڑ کنگ ءَ انت، اے رنگیں گامگیج پاکستان ءَ ھوار سرجمیں دمگ ءَ بے رھبند کنگ ءَ انت۔ صدر ءِ مملکت ءَ گوشت کہ اوگان حکومت نمائندہ حکومت ءِ وعدہ ءَ چہ دزگٹ بوھگ ءَ اِنت۔ افغان طالبان ءَ اقتدار ءِ سرا اجارہ داری جوڑ کتگ۔ صدر آصف علی زرداری ءَ گوشت کہ پاک فوج ءَ اسپن بولڈک ءُ کرم ءِ سیکٹر ءَ اُرش آں جوانیں رنگ ءَ گر ءُ دار کتگ۔ آئی ءَ گوشت کہ اوگان واکدار وتی دمگ ءَ را ناشرکاری ءُ پاکستان ءِ ھلاپ ءَ کارمرد کنگ ءِ موہ مہ دینت، چیاکہ اے رنگیں اُرش پڑ ءِ امن ءُ دوستی ءِ سیادی ءَ را تاوان دنت۔ آئی ءَ گوشت کہ پاکستان گوں درستیں ھمساھگیں ملک آنی گوما امن ءُ کمکی سیادی لوٹ ایت، ءُ پاکستان ءِ سر ءَ ھرچ وڑیں زوراکی ءِ سر ءَ مھکمیں ءُ پیسلہ کنوکیں پسو دیگ بیت۔