بنجائی وزیر ریلوائی محمد حنیف عباسی نا کماشی ٹی وزارت ریلوائی ٹی پشاور ریلوے ڈویژن نا امور آ اسہ اہم ءُ دیوان اس

اسلام آباد۔ 14 اکتوبر (اے پی پی) بنجائی وزیر ریلوائی محمد حنیف عباسی نا کماشی ٹی وزارت ریلوائی ٹی پشاور ریلوائی ڈویژن نا امور آ اسہ اہم ءُ دیوان اس مس، ہراٹی پشاور ڈویژن نا کنڈآن وزیر ریلوائی ءِ آ ن لائن حوال تننگا۔ دیوان اٹی آپریشنز، مینٹیننس ، اینٹی انکروچمنٹ مہم، سفائی ستھرائی و مسافر آتے تروک آ آسراتی تا بابت سرجم پیش رفت آن معلومدار کننگا۔ ڈی ایس پشاور فرمان غنی پارے کہ پشاور ڈویژن اٹی ٹرین تا پنکچوئیلٹی 99 درسد اسکان سرمسنے، وخت اس کہ تدوک آمسہ تُو اٹی منگوڑ، پشہ یا لال بیگ نا بابت ہچ ءُ غاو اس ملتنے۔ اومستی پارے کہ فومیگیشن مہم گچین وڑاٹ برجاءِ و ٹرین و اسٹیشن تیا سفائی نا گچین بست وبند آتے پک کننگ انگ ءِ۔ وزیر ریلوائی پارت کرے کہ ٹرین ڈیور آتا سیفٹی و کمفرٹ آ ہچ ءُ سمجھوتہ اس کننگپ ۔ اوپارے کہ مسافر آتے ہرممکن آسراتی فراوان کننگ وزارت ریلوائی نا اولیت ءِ۔ محمد حنیف عباسی بیدس ٹکٹ سفر کروک آتیا سخت نظرتخنگ و گچین کارروائی نا ہم پارت کرے۔ حوال اٹی پاننگاکہ پشاور ریلوائی ڈویژن نا 9 اسٹیشن پورو وڑاٹ سولر انرجی آ گدریفنگانو، وخت اس کہ 1400 ریلوائی کوارٹرزنا سولرائزیشن و میٹرائزیشن نا عمل ہم پورو کننگانے۔ دیوان ءِ پاننگاکہ اینٹی انکروچمنٹ مہم پبی وڑاٹ برجاءِ و ریلوائی ڈغار تا رکھ آ ہچ ءُ سمجھوتہ اس کپننگ انگ ءِ۔ وزیرریلوائی پشاور ڈویژن نا انتظامیہ نا کارکڑد نا ستاءِ کرے و پارے کہ غٹ ریلوائی ڈویژن تیٹی ہندا طرز انا سرجم حوال باقاعدگی اٹ اڈتننگک۔ محمد حنیف عباسی پارے کہ پاکستان ریلوائی جدت، شفافیت و السی خذمت نا پوسکن آ دور اٹی پترینگانے و محکمہ ریلوائی مسافر آتے گچین آسراتی ، سفائی و رکھ سفر فراوان کننگ کن سنبرینگوک ءِ۔