پاکستان و آذربائیجان نا تعلقداری تین پہ تینی پت، شرف و اسیجائی شونداری نا عزم آ تالان ءِ، چیئرمین سینیٹ سید یوسف رضاگیلانی

اسلام آباد۔ 14 اکتوبر (اے پی پی) چیئرمین سینیٹ سید یوسف رضاگیلانی پارینے کہ پاکستان و آذربائیجان نا تعلقداری تین پہ تینی پت، شرف و اسیجائی شونداری نا عزم آ تالان ءِ، پاکستان ڈیہہ اٹی امن و شونہالی نا مون آ دننگ ءِ تینا اولیت آتیٹی اوار تخک۔ سے شنبے نادے آ سینیٹ سیکرٹریٹ نا کنڈآن جاری بیان نا رداٹ چیئرمین سینیٹ سید یوسف رضاگیلانی تون آذربائیجان نا اسپیکر ملی مجلس صاحبہ غفارووا داڑے اوڑدہی کرے۔ اوڑدہی ٹی ہڑتوم آ کنڈآتا تعلقداری، پارلیمانی کمکاری، واپار، زرکاری و علاقائی رابطہ غاتا مون آ دننگ آ سرجمی اٹ گپ وتران کننگا۔ چیئرمین سینیٹ پارے کہ پاکستان آذربائیجان تون برادرانہ تعلقداری ءِ بے کچ قدر انانظر اٹ ہرک ۔ پاکستان و آذربائیجان نا تعلقداری تین پہ تینی پت، شرف و اسیجائی شونداری نا عزم آ تالان ءِ، گونڈ مد اٹی ہڑتوم آ ملک آک بے مٹ تعلقداری قائم کریر ہرادنیا کن قابل تقلید ءِ۔ اوپارے کہ بڑزکو کہولی رابطہ تعلقداری تے پین ودفنگ نا عزم انا درشانی ءِ، آذربائیجان نا صدر الہام علیوف نا گمانی دورہ ہڑتوم آ کنڈآتا تعلقداری تے پوسکن آ سوگو بنداو فراوان کیک، ہڑتوم آملک آتا ادارہ جاتی رابطہ باقاعدگی اٹ برجاءِ ہرا تعلقداری نا سوگوی نا شاہدی ءِ۔ سید یوسف رضاگیلانی پارے کہ ہڑتوم آملک آتا پارلیمان تا تعلقداری پین سوگو مسنے۔ اوفروری 2025ء ٹی باکو ٹی مروک آ ایشین پارلیمانی اسمبلی ٹی بشخ ہلنگ ءِ خوشگوار آزموندہ گوندساپارے کہ پارلیمانی فرینڈ شپ گروپ آتا نیام اٹ رابطہ السی کہول آ تعلقداری تا مون آ دننگ نا سوب جوڑمریک ۔ چیئرمین سینیٹ آذربائیجان نا اسپیکر ءِ نومبر اٹی اسلام آباد اٹی مروک آ بین الپارلیمانی اسپیکر کانفرنس اٹی بشخ ہلنگ نا سلہ خلک۔