جام کمال خان ءِ گشگ انت کہ پاکستان، ویتنام ءِ نیام ءَ ٹیکسٹائل، چمڑہ، فارما، زراعت، فوڈ پروسیسنگ ءُ آئی ٹی ءِ شوبگ ءَ کمک ءِ مزنیں موہ است انت

اسلام آباد۔14اکتوبر  (اے پی پی): وفاقی وزیر تجارت جام کمال خان ءَ گوشت کہ پاکستان ءُ ویتنام ءِ نیام ءَ دیریں ءُ دوستی ءِ سیادی گیش مھکم بوھگ ءَ انت۔ دوئیں ملک آنی نیام ءَ ٹیکسٹائل، چمڑہ، فارما، زراعت، فوڈ پروسیسنگ ءُ آئی ٹی ءِ شوبگ آنی تہ ءَ کمک ءِ واستہ مزنیں موہ است انت۔ ترجیحی تجارتی معاہدے ءَ چہ مارکیٹ ءِ رسائی ءُ تجارتی تنوع ءَ را گیش کنگ بیت۔ اے ھیالانی درشانی آئی ءَ سئے شمبے ءِ روچ ءَ یک دمگی ھوٹلے ءَ برجم داشتگیں پاکستان ویتنام بزنس فورم ءَ گوں گشتانک دیان ءَ کت۔ آئی ءَ گوشت کہ دوئیں ملک آنی کاروباری ادارگ دراجیں مدت ءِ شریکداری ءَ را جوڑ بہ کن اَنت۔ پاکستان ءَ ورنا کار ءِ ٹولی ءُ دلکشیں کاروباری ماحول است انت ایشی ءَ چہ دوئیں ملک آنی نیام ءَ تجارت ءَ را آسراتی رس ایت۔ آئی ءَ گوشت کہ مارا ویتنام ءِ صنعتی دیمروئی ءُ ارزشت ءِ گیشیں مینوفیکچرنگ ءَ چہ دربرگ لوٹ ایت۔ کاروباری فورم پاک ویتنام ءِ اقتصادی سیادی ءِ نوکیں باب ءِ بندات اِنت۔ وفاقی وزیر برائے تجارت ءَ گوشت کہ دو نیمگی تجارت ءِ دیمروئی ءِ تہ ءَ گند ءُ نند ءُ بی ٹو بی سیشن ھاسیں کرد پیلو کن اَنت۔ جام کمال خان ءَ ویتنام ءِ کمپنی آناں پاکستان ءِ جتا جتائیں شوبگ آنی تہ ءَ سرمایہ کاری ءِ دعوت دات۔ آئی ءَ گوشت کہ پاکستان ءُ ویتنام ءَ ترجیحی تجارتی معاہدے (پی ٹی اے) ءِ سر ءَ گپ ءُ تران بندات کنگ ءِ سر ءَ تپاک کتگ، 2025ءِ گڈ ءَ پی ٹی اے ءِ سرجمی ءُ دستخط کنگ ءِ ٹارگٹ اِنت، اے معاہدے ءَ چہ دوئیں ملک آنی نیام ءَ تجارت ءَ را باز رند ءَ گیش کنگ بیت ءُ دیمروئی ءِ نوکیں راہ پچ بنت۔ مراگش ءَ گوں تران کنان ءَ ویتنام ءِ صنعت ءُ تجارت ءِ وزیر نگوک ہوانگ ڈائن ءَ گوشت کہ پی ٹی اے ءَ چہ پائیدار دیمروئی ءِ واستہ نوکیں موہ پیداک بنت۔ آئی ءَ گوشت کہ ویتنام ءِ سرمایہ کار پاکستان ءِ بازیں شوبگ آنی تہ ءَ سرمایہ کاری کنگ لوٹ اَنت ھاسیں رنگ ءَ پرائیویٹ سرمایہ کار معدنی، فارما، ٹیکسٹائل ءُ چمڑی ءِ شوبگ آنی تہ ءَ دلچسپی دار اَنت۔ کاروباری فورم ءِ تہا پاکستان ءِ تجارتی دیمروئی اتھارٹی ءُ ویتنام ءِ صنعت ءُ تجارت ءِ وزارت ءَ ہم پریزنٹیشن داتگ ات، ءُ دوئیں ملک آنی وزیراں نجی شعبہ ءَ را ہم دعوت داتگ ات کہ آ یکجائی منصوبگ آنی تہ ءَ سرگرمیں کرد پیلو بہ کن انت۔ کاروباری فورم ءَ پاکستان ءُ ویتنام ءِ درجناں کاروباری نمائندگاں بہر زرتگ ات۔ کاروباری دیوان ءَ دوئیں وزیراں دو نیمگی سیادی ءِ واستہ نوکیں اقتصادی دور ءِ بندات کنگ ءِ وتی عزم ءِ پدا زور دات ءُ دوئیں ملک آنی تہ ءَ تجارت، سرمایہ کاری، ٹیکنالوجی، رابطہ ءُ سیل ءُ سواد ءِ پڑ ءَ کمک ءَ را گیش کنگ ءِ سر ءَ تپاک کت۔ جام کمال خان ءَ ویتنام ءِ کاروباری براتی ءَ را نومبر ءَ کراچی ءَ برجم دارگ بوؤکیں فوڈ اینڈ ایگریکلچر ایکسپو ءَ بہر زورگ ءِ دعوت داتگ۔