فلسطینی الس نا آجوئی، عزت و شونہالی پاکستان نا بنداوی اولیت ءِ، وزیراعظم شہباز شریف

شرم الشیخ۔ 14 اکتوبر (اے پی پی) وزیراعظم محمد شہباز شریف پارینے کہ فلسطینی الس نا آجوئی، عزت و شونہالی پاکستان نا بنداوی اولیت ءِ، 1967ء آن مست انا سیم تا رداٹ اسہ سوگو و قابل عمل فلسطینی ریاست اسے ناٹہیفنگ ہرانا دارالحکومت القدس الشریف مرے، پاکستان نا دے ٹک نیامی پالیسی نا بنداوی مسنے و مریک۔ شرم الشیخ اٹی غزہ امن سروک دیوان اٹی بشخ ہلنگ آن پد وطن آ پدی بننگ آن مست راجی رابطہ نا پلیٹ فارم ’’ایکس‘‘ آ اسہ پوسٹ اسے ٹی وزیراعظم پارے کہ او شرم الشیخ اٹی غزہ امن سروک دیوان اٹی بشخ ہلنگ آن پد وطن آ پدی ہِننگ کن ہوائی جہاز آ سُوار مننگ ءِ و گمانی وڑاٹ دا بھلا پیش رفت نا نوعیت نا بارواٹی تینا گڑاس تاثرآتے پاننگ خواہک کہ دا امر ممکن مس و پاکستان نا انت اکن داڑتون بھلا گہرا تعلق مسنے ۔ وزیراعظم پارے کہ پاکستان نا غٹ آن اہم اولیت غزہ ٹی نسل کشی نا مہم ءِ دمدستی وڑاٹ توننگ ئس ، ایلو ایلم ملک آتون اواری اٹ دا اولیت ءِ چرجوئی اتون بیان کننگا و سوگوی تننگا۔ وزیراعظم پارے کہ صدر ٹرمپ اکن ننا منت واری داہیت انا بناغاٹی ءِ کہ اواودے تورک و دا قول ءِ پورو کیک۔ وزیراعظم پارے کہ نن امن کن صدر ٹرمپ انا یکتا کڑد انا ستاءِ کرسا کینہ، فلسطینی الس نا آجوئی، وقار و شونہالی پاکستان کن بنداوی اہمیت تخک۔ وزیراعظم پارے کہ انشاء اللہ 1967ء آن مست انا سیم تا بنداو آ ہرانا دارالحکومت القدس الشریف مرے، اسہ سوگو و قابل عمل فلسطینی ریاست اسے نا ٹہیفنگ پاکستان نا دے ٹک نیامی نا پالیسی نا بنداو ءِ و مریک۔