امریکہ تون ٹیرف معاہدہ غا سرسہب مذاکرات ستاکڑزک، ملک اناشونداری ٹی نجی بشخ ءِ قائدانہ کڑد ادا کروئی مریک، وزیرخزانہ محمد اورنگزیب ناامریکہ ٹی اوڑدہی ٹی گپ وتران

واشنگٹن۔ 14 اکتوبر (اے پی پی) بنجائی وزیر خزانہ سینیٹر محمد اورنگزیب امریکہ تون ٹیرف معاہدہ غا سرسہب مذاکرات ءِ ستاکڑزوک گوندسا پارینے کہ ملک انا شونداری ٹی نجی بشخ ءِ قائدانہ کڑد ادا کروئی مریک، حکومت کاروباری تپہ ءِ مون تروک مشکل آتیان معلومدار ءِ و اوفتے زیات آن زیات ریلیف فراوان کننگ کن گام گیج کننگ ءِ  ۔ اوداہیت ءِ واشنگٹن ڈی سی ٹی امریکی محکمہ خزانہ نا اسسٹنٹ سیکرٹری جہانی مالیات رابرٹ کیپ روتھ و سلاہکار جوناتھن گرین اسٹیئن و یوایس۔ پاکستان بزنسل کونسل نا راہشون و باسک آتون اوڑدہی ٹی پارے۔ وزیرخزانہ دادے تیٹی آئی ایم ایف و جہانی بینک انا سالانہ دیوان تیٹی بشخ ہلنگ کن واشنگٹن اٹی ساڑی ءِ۔ امریکی محکمہ خزانہ نا اسسٹنٹ سیکرٹری جہانی مالیات رابرٹ کیپ روتھ و سلاہکار جوناتھن گرین اسٹیئن تون اوڑدہی ٹی وزیرخزانہ آئی ایم ایف پروگرام نا رداٹ پاکستان نا سوگو زرگزرانی بنداوتے مون آ تخا و امریکی کمامدار آتے پاکستان اٹی ورچوئل میرات آتا ریگولیشن نا بابت کانود سازی آن معلومدار کرے۔ اوامریکی کمپنی تے تیل وگیس ، معدنیات، کشت وکشار و آئی ٹی نا بشخ آتیٹی زرکاری نا سلہ ہم خلک۔ داوخت آ اوبشخ ہلوک آتے پاکستان نا زرگزرانی ٹک آتیٹی مروک آگچینی آن معلومدار کرسا داہیت آ زور شاغا کہ ملک انا شونداری ٹی نجی بشخ ءِ قائدانہ کڑد ادا کروئی مریک۔ وزیرخزانہ پارے کہ حکومت کاروباری تپہ نا مشکل آتیان واقف ءِ و اوفتے زیات آن زیات ریلیف فراوان کننگ کن گام گیج کننگ ءِ۔ اوامریکہ تون مروک آ واپاری معاہدہ ءِ اہم مزل نا نشان گوندساپارے کہ او امریکی کمپنی تتون سرکاری و نجی کہول آ خاص کر معدنیات ، کشت وکشار ، آئی ٹی و دواسازی نا بشخ آتیٹی رابطہ غاتا مون آ دننگ نا خواہندار ءِ۔ سیشن نا ایسر آ او بشخ ہلوک آتا سوج آتا ورندی ءِ ترسا باوری کرفے کہ اوفتا روا گڑتی تے ایسر کننگک۔ وزیرخزانہ سٹی بینک انا نمائندہ غاتون ہم اوڑدہی کرے۔ داوخت آ وزیرخزانہ پاکستان تون بینک انا مریس شریداری نا تعلقداری تا ستاءِ کرسا پدریسہ کمکاری آ منت واری ءِ ہرفے۔ اوجہانی ریٹنگ ایجنسی تا توثیق اتون برجا اصلاحاتی گام گیج آتیٹی پاکستان نا سوگو زرگزرانی حالیت آتے مون آ تخا۔