پاکستان اٹی تدوک آ سال انا مقابلہ ٹی دین انا ساڑی گری ٹی جم وڑاٹ کمتی بسنے، عائشہ رضافاروق

اسلام آباد۔ 13 اکتوبر (اے پی پی) وزیراعظم نا فوکل پرسن پولیو تور عائشہ رضافاروق پارینے کہ پاکستان اٹ تدوک آ سال انا مقابلہ ٹی دین انا ساڑی گری ٹی جم وڑاٹ کمتی بسنے ولے ننا سفر داسکان چٹتنے، خاص وڑاٹ ساڑی آ نوکاپ آن پد پولیو نا تالانی نا خطرہ زیات ودانے۔ چناتے پولیو آن بچفنگ ننا غٹ انا اسیجائی زمواری ءِ۔ نیشنل ایمرجنسی آپریشن سینٹر نا کنڈآن جاری بیان نا رداٹ مچ آ ملک انا 159 ضلع غاتیٹی 7 دے ئی قومی پولیو مہم نا بناءِ کننگانے۔ مہم اٹی 4 کروڑ 50 لکھ آن زیات چناتے پولیو نا پڑی کنفنگک، تانکہ ہر چنامچ آ وئی نا معذوری آن رکھ مننگ کے۔ داکان بیدس ، چناتا وقوت مدافعت ءِ سوگو کننگ کن اوفتے پولیو ویکسین تون وٹامن اے انا ودکی خورہم تننگک۔ 1994 ٹی پاکستان پولیو تور پروگرام نا بناآن ہلیس داتم اسکان، اُرا اُرا پولیو ویکسی نیشن مہم آتیٹی پولیو نا سالانہ کیس آتیٹی 99.6درسد کمتی بسنے، ہرا 20000سالانہ کیس آتیان کم مرسا 2024 اٹی 74 رہینگانے و برجاسال داتم اسکان 29 کیس رپورٹ مسنے۔ نیشنل ایمرجنسی آپریشنز سینٹر و اونا شریدار ادارہ غاک مچ آ ملک اٹی 4 لکھ آن زیات تربیت یافتہ پولیو ورکرآتے متحرک کرینو، ہرا ہراُراغا ہنسا چناتے پولیو آن بچفنگ نا پڑی کنفرہ، دا مہم 13 آن 19 اکتوبر اسکان ملک انا غٹ بشخ آتیٹی برجاسلک وخت اس کہ سویلی خیبرپختونخوا نا 7ضلع غاتیٹی دامہم 20 آن 23 اکتوبراسکان اڈتننگک۔ دا برجاسال انا چارمیکو قومی پولیو مہم ءِ ہراٹی پنجاب اٹی2 کروڑ30 لکھ آن زیات چنا، سندھ اٹی 1 کروڑ 6لکھ آن زیات چنا، خیبرپختونخواٹی 72لکھ آن زیات چنا، بلوچستان اٹی 26 لکھ آن زیات چنا، آزاد جموں وکشمیر اٹی 7 لکھ 60 ہزار آن زیات چنا، گلگت بلتستان اٹی 2 لکھ 28 ہزار آن زیات چنا، و اسلام آباد اٹی 4 لکھ 60 ہزار آن زیات چناتےپولیو نا پڑی کُنفنگک۔