وزیراعظم محمد شہباز شریف امریکی صدر ڈونلڈ ٹرمپ و مصری صدر عبدالفتاح السیسی نا خصوصی سلہ غا غزہ امن معاہدہ غا دستخط نا دود اٹی بشخ ہلنگ کن شرم الشیخ آ روانہ مس

لاہور۔ 13 اکتوبر (اے پی پی) وزیراعظم محمد شہباز شریف امریکی صدر ڈونلڈ ٹرمپ و مصری صدر عبدالفتاح السیسی نا خصوصی سلہ غا غزہ امن معاہدہ غا دستخط نا دود اٹی بشخ ہلنگ کن شرم الشیخ آ روانہ مس ہراڑے او غزہ ٹی جنگ بندی کن شرم الشیخ امن سروکی دیوان اٹی بشخ ہلیک۔ نائب وزیراعظم و وزیرخارجہ محمد اسحاق ڈار و وزیرحوالکاری و شینکاری عطاء اللہ تارڑ وزیراعظم تون اوار ڈل اٹی شریک ءُ ۔ دوشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم امریکی صدر ڈونلڈ ٹرمپ، مصری صدر عبدالفتاح السیسی ، امیر قطر شیخ تمیم بن حمد الثانی، ترکیہ نا صدر رجب طیب اردوان و ایلو جہانی راہشون آتا ساڑی گری ٹی غزہ امن معاہدہ غا دستخط نا دود اٹی خصوصی بشخ ہلیک۔ شرم الشیخ اٹی مروک آ امن سروکی دیوان، صدر ڈونلڈ ٹرمپ، وزیراعظم شہباز شریف و عرب اسلامی راہشون تا اقوام متحدہ جنرل اسمبلی نا وخت آ غزہ ٹی جنگ بندی کن خصوصی کوشست آتا بھرم ءِ۔ اسیجائی اعلامیہ نا کمک اٹ وزیراعظم تون اوار دا ملک آتا سروک آک امریکی صدر ڈونلڈ ٹرمپ انا غزہ ٹی جنگ بندی، پائیدار امن و ڈیہہ انا شونداری نا بابت ڈٹ آتا خیرمقدم ءِ کریسر۔ وزیراعظم نا شرم الشیخ امن سروکی دیوان اٹی بشخ ہلنگ پاکستان نا فلسطینی تا حق اکن توار بڑز کننگ و اوفتے ہروڑنا سیاسی و سفارتی کمک نا فراوانی نا عکاسی ءِ کیک۔ پاکستان دااومیت کیک کہ دا امن سروکی دیوان و اوٹی دستخط مروک معاہدہ غان پد غزہ ٹی برجا ظلم انا چرجوئی سلک، غزہ غان اسرائیلی فوج انا انخلاء مریک۔ فلسطینی تا تینا اُراتیا پدی کارہ، اوفتا رکھ ءِ پک کننگک، بندی تا رہائی مریک و امن تون اوار اوار غزہ نا پوسکن تفنگ ممکن مریک۔ بیان نا رداٹ پاکستان پراومیت ءِ کہ داوڑنا گام گیج آتیان نئے بیرہ دے ٹک نیامی ٹی دیرپاامن نا متکن آ تغ پورو مریک بلکن اقوام متحدہ نا قرارداد آتا رداٹ و فلسطینی تا است خواہی تا ترجمانی ءِ کرسا اسہ آجو و وتواجہ فلسطینی ریاست اس جوڑ مریک ہرانا سیمک 1967 آن مست انا رداٹ مریرہ و القدس الشریف اونا دارالخلافہ مریک۔