پاکستان وتی راجی مفاد، علاقائی حاکمیت ءُ ایمنی ءِ رکھینگ ءِ ھاترا جزم انت، پاکستان جموں ءُ کشمیر ءِ بابت ءَ ھچ وڑیں جنجالی یا گمراہ کنوکیں موقف ءَ کدی منگ نہ کنت، صدر آصف علی زرداری

اسلام آباد۔12اکتوبر (اے پی پی): صدر آصف علی زرداری ءَ گوشت کہ پاکستان وتی راجی مفاد، سرزمین ءِ وت واجہی ءُ ایمنی ءِ رکھینگ ءِ واستہ جزم اِنت، پاکستان جموں ءُ کشمیر ءِ ھوالگ ءَ ھچ وڑیں جنجالی یا گمراہ کنوکیں موقف ءَ را کدی نہ من ایت، بھارت ءِ نیمگ ءَ چہ میاں اوستمانی کانود ءُ کشمیر ءِ ھوالگ ءَ ھرچ ناجائزیں دعویٰ اقوام متحدہ ءِ کانود ءِ ھوالگ ءَ اِنت۔ یک شمبے ءِ روچ ءَ صدر گس ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر آصف علی زرداری ءَ اوگانستان ءِ نیمگ ءَ زوراکی ءِ سر ءَ رد عمل پیش کنان ءَ گوشت کہ پاکستان وتی راجی مفاد، سرزمین ءِ وت واجھی ءُ ایمنی ءِ رکھینگ ءِ واستہ جزم اِنت۔ صدر ءِ مملکت ءَ اپسوز ءِ درشان کنان ءَ گوشت کہ اوگان سروکی ءَ مقبوضہ جموں ءُ کشمیر ءِ مظلوم الس آنی آجوئی ءِ جہد ءَ پد پشت ئِے کنان ءَ راجدپتر ءُ راج دوئیں آنی گوما ناانصافی کتگ۔ اقوام متحدہ ءِ رپورٹانی رد ءَ عبوری اوگانستان ءِ سرزمین ءَ چہ فتنہ الخوارج ءِ اُرش یک ثابتیں راستی یے ۔ پاکستان ءَ باز رند ءَ اے گپ پدر کتگ کہ پاکستانی شہری ءُ سیکورٹی کارندہ فتنہ الخوارج ءُ فتنہ الهندستان ءِ گِر ءُ دار ءِ نشانگ جوڑ کنگ بوھگ ءَ اَنت۔ صدر ءِ مملکت ءَ اوگان سروکی ءَ پاکستان ءِ ھلاپ ءَ ناشرکاریں عناصر ءِ ھلاسی ءِ واستہ عملی گامگیج چست کنگ ءِ لوٹ کتگ۔ فتنہ الخریج ءُ فتنہ الهندستان دمگ ءِ امن ءُ ایمنی ءِ واستہ مستریں ھترہ انت ۔ ناشرکاری ءِ ھلاپ ءَ جنگ یک مشترکہ ذمہ واری یے ءُ ایشی ءِ بار یکیں ملک ءِ سر ءَ ایر کنگ نہ بیت۔ پاکستان ءَ چار دہائی ءَ چہ اوگان الس ءِ میزبانی ءَ چہ اسلامی برات ءُ جوانیں ہمساہگی ءِ مثال پیش کتگ۔ امن ءِ بحالی ءِ گوما اوگان شہری آنی شرپداریں واتر بوھگ دوئیں ملک آنی مفاد ءِ تہ ءَ اِنت۔ پاکستان اوگان الس ءِ وانگ ءُ زانگ ءُ انسانی ضلورت آنی گوما دیم پہ دیم ءَ کمک کنت ۔ پاکستان وتی راجی وت واجہی ءِ سرا سمجھوتہ نہ کنت۔ صدر ئِ مملکت ئَ گوشت کہ پاکستان ئَ اوگانستان ئَ را بیپار، معیشت ءُ سیادی ئِ دیمروئی ئِ واستہ ھمک رنگ ئِ آسراتی داتگ اَنت۔ یکے دومی ءِ کمک ءُ اقتصادی شراکت داری دمگ ءِ تہ ءَ برجمیں امن ءُ دیمروئی ءِ بنیات اِنت۔ پاکستان پرامن، مھکم ءُ وشھالیں اوگانستان ءِ نیک واھشت اِنت۔ برادرانہ تعلقات یکے دومی ءِ احترام، سیکورٹی تعاون ءُ دمگی امن ءَ گوں بندوک انت۔ صدر ءِ مملکت ءَ گوشت کہ پاکستان ءِ امیت انت کہ اوگانستان ءِ عبوری حکومت وتی سرزمین ءَ را فتنہ الخریج ءُ فتنہ الهندستان ءِ ناشرکاریں عناصر کارمرد کنگ ءَ چہ بہ رکین ایت۔ ناشرکاری ءِ ھلاپ ءَ یکجائی ءُ عملی گامگیج دائمی امن ءِ یکیں ضمانت انت۔