بنجائی وزیر جان جوڑی مصطفیٰ کمال نا کماشی ٹی نیشنل انٹراایجنسی کوآرڈینیشن کمیٹی نا دیوان

اسلام آباد۔ 10 اکتوبر (اے پی پی) بنجائی وزیر جان جوڑی مصطفیٰ کمال نا کماشی ٹی نیشنل انٹراایجنسی کوآرڈی نیشن کمیٹی نا دیوان اڈ ہلک۔ دیوان اٹی فیڈرل سیکرٹری ہیلتھ، ڈی جی ایف ڈی آئی تون اوار چندی بنجائی و صوبائی محکمہ و جہانی شریدار ادارہ غاتا نمائندہ غاک بشخ ہلکر۔ دیوان اٹی 17 آن 29 نومبر 2025 اسکان برجاسلوک آ مچ آملک سورک و روبیلا (ایم آر) ویکسی نیشن مہم نا تیاری و بست وبند آتا سرجمی اٹ جاچ ءِ ہلنگا۔ بنجائی وزیر جان جوڑی مصطفیٰ کمال دیوان آن تران کرسا پارے کہ سورُک و روبیلا داسہ ہم پاکستان اٹی اہم السی جان جوڑی نا چیلنج آتیٹی اوار ءُ۔ داناجوڑی تیان بچنگ کن وخت آ ویکسی نیشن و گچین آگاہی مہم المی ءِ۔ اومستی پارے کہ بنجاغٹ صوبہ غاتون خڑکی رابطہ و گچین کوآرڈی نیشن نا کمک اٹ مہم ءِ سرسہب کننگ کن سنبرینگوک ءِ۔ وزیرجان جوڑی پارت کرے کہ السی آگاہی مہم کن کلہو رسانی ءِ پین گچین، مربوط و جوان کننگے تانکہ چناتا ویکسی نیشن پک مننگ کے۔ سینیٹر مصطفیٰ کمال داہیت آ زور شاغا کہ الس ءِ دین و ناجوڑی تیان بچفنگ ہی حقی وڑتیٹی ہیلتھ کیئر ءِ۔ نن دا مسخت کن غٹ گمانی گام گیج آتے پک کننگ اُن۔ اوپارے کہ بروک آ ایم آر ویکسی نیشن مہم اٹی 5 سال اسکان نا وئی نا ہر چنانا ویکسی نیشن ءِ پک کننگے و زیات آن زیات کوریج دوئی کننگ کن غٹ ادارہ غاک متحرک کڑد ادا کیر۔