وزیراعظم شہباز شریف نا اورکزئی ٹی 30 دہشت گرد آتے جہنمی کننگ آ سیکورٹی فورس آتے خراج تحسین

اسلام آباد۔ 10 اکتوبر (اے پی پی) وزیراعظم محمد شہباز شریف اورکزئی ٹی 30 دہشت گرد آتے جہنمی کننگ آ سیکورٹی فورس آتا کسبی لائخی تا ستاءِ کرساپارینے کہ سیکورٹی فورس آتا آفیسر و ورناک تینا جون تے دلدست آ تخسا ملک دشمن زموار آتا ناپاک عزم آن ارض وطن نا رکھ اٹی دے ونن لگوک ءُ، لیفٹیننٹ کرنل جنید طارق شہید و میجر طیب راحت شہید تون اوار ایلو شہید آتا قربانی تے زیان مننگ کن اِلیپنہ۔ جمعہ نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم تدوک آ دے اورکزئی ٹی دہشت گردی ٹی اوار فتنۃ الخوارج نا دہشت گرد آتا برخلاف جمال مایہ ٹی سرسہب آپریشن آ سیکورٹی فورس آتا آفیسر و کارندہ غاتے خراج تحسین پیش کرے۔ وزیراعظم کارروائی ٹی اوار سِی دہشت گرد آتے جہنمی کننگ آ سیکورٹی فورس آتا کسبی لائخی تا ستاءِ کرسا پارے کہ لیفٹیننٹ کرنل جنید طارق شہید و میجر طیب راحت شہید تون اوار ایلو شہید آتا قربانی تے زیان مننگ کن اِلیپنہ۔ اوپارے کہ سیکورٹی فورس آتا آفیسر و ورناک تینا جون تے دلدست آ تخسا ملک دشمن زموار آتا ناپاک عزم آن ارض وطن نا رکھ اٹی دے ونن لگوک ءُ۔ وزیراعظم پارے کہ پاکستان نا فوج انا ہر آفیسر وورناہراوطن عزیز نا خاطر شہیدی نا جام ءِ کُنیک کنتون اوار مچ آ قوم انا گمر ءِ، دہشت گرد آتا ناپاک عزم ءِ اسُل سرسہب مننگ کن اِلیپنہ و دہشت گردی نا عفریت نا ملک آن پورو چٹفنگ اسکان اوفتا برخلاف جنگ ءِ برجاتخنہ۔ وزیراعظم پارے کہ ارض وطن نا رکھ انا بدل مفروک عزم اٹی کنتون اوار مچ آ قوم تینا بہادر فوج اتون ہم کوپہ سلوک ءُ۔