لوک ورثہ ٹی بلوچستان گرینڈ ٹورازم فیسٹیول نا بناء، وزیراعلیٰ بلوچستان میر سرفراز خان بگٹی بناءِ کرے

اسلام آباد۔ 10 اکتوبر (اے پی پی) وزارت قومی میرات نا کمک اٹ مسہ دے ئی بلوچستان گرینڈ ٹورازم فیسٹیول نا جمعہ نادے لوک ورثہ اسلا م آباد اٹی بنامس۔ دا فیسٹیول اٹی بلوچستان نا تہذیب و دودوربیدہ نا بابت چندی اسٹال آتے خلنگانے ہرافتے ٹی بلوچستان نا روایتی پکوان ، لویس و ایلو دودوربیدہ نا بابت گڑاتے تخنگانے۔ دا مسہ دے ئی فیسٹیول نا مسخت بلوچستان نا دودوربیدہ، ٹورازم و آرکائیوز ءِ تالان کننگ ءِ۔ دود انا مہمان خاص وزیراعلیٰ بلوچستان میر سرفراز بگٹی ئس ہرا دا مسہ دے ئی فیسٹیول نا بناءِ کرے۔ بنجائی وزیر قومی میرات و دودوربیدہ اورنگزیب خان کھچی مہمان خاص ءِ بخیرکرے۔ داوخت آ وزیراعلیٰ بلوچستان میر سرفراز بگٹی پارے کہ دا فیسٹیول آن بلوچستان نا دودوربیدہ ءِ بھاز پزیرائی ملنگ ءِ۔ بلوچستان مہماندار مخلوق نا ڈیہہ ءِ ہراوڑاٹ ہموجاگہ نا مخلوق مہماندار ءُ ہموڑے ہموجاگہ نا سمندر، مش، میدانک ہم است انا ہب اٹ سیل و سواتی تے بخیر اٹ پارہ۔ اوپارے کہ بلوچستان اٹی بھاز انگا ہندن ءُ جاگہ ءُ ہرافتے وزٹ کننگ مریک ، بلوچستان اٹی ٹورازم و کلچر نا بابت بھاز پوٹینشل ساڑی ءِ۔ اوپارے کہ ٹورازم نا بابت ہرا شریدار بلوچستان آ بریک اوفتے نن باور کرفنہ کہ اوفتا غٹ ویل آتا ون ونڈو آپریشن نا کمک اٹ ایسر اس کشنگک۔ دود آن تران کرساپارلیمانی سیکرٹری دودوربیدہ، سیل و سوات و کانود میر زرین خان بگٹی پارے کہ بلوچستان اٹی دنیا نا زیبا انگا کرک، مش و میدان ارے۔ اوپارے کہ نن جہانی و قومی ڈونر ایجنسی و نجی فرم آتے سلہ خلینہ کہ او بریر و ننتون قدرتی وسیلہ غاتے پٹنگ اٹ کمک کیر و دا وسیلہ غاتیان فائد ہرفر۔ اوپارے کہ بلوچستان اٹی گڈانی، کنڈملیر، گولڈن بیچ گوادر، ہنگول نا جنگلات نمان ءُ ۔ اوپارے کہ صوبہ بلوچستان اٹی اقلیت آتے ہم ہموہند دوئی ءِ ہراہموجاگہ نا رہینگوک آتے دوئی ءِ و دانا غٹ آن بھلا درور، ہنگول ماتانا مندر ءِ۔ اوپارے کہ زیارت اٹی جنوپرنا جنگل آک مچ آ دنیا ٹی تینا زیبائی نا سوب آن پنی ءُ و سیل و سواتیک دا جاگہ غان لطف اندوز مننگ کن وزٹ کیرہ۔ بلیو اکانومی نا بابت ہیت کرسا گرین ٹورازم نا منیجنگ ڈائریکٹر لیفٹیننٹ جنرل (ر) حسن اظہر حیات خان پارے کہ ننے ہندی آبادی ءِ اوار کننگ نا گرج ءِ ہراڑآن ٹورازم ءِ مون آدننگ ملک۔