کانود سازی نا نظام ءِ پوسکن جوڑ کننگ نا مسخت آن ای۔ پارلیمنٹ نا ٹہیفنگ کن ڈیجیٹائزیشن نا عمل نا بناءِ کننگانے، اسپیکر قومی اسمبلی سردار ایاز صادق

اسلام آباد۔ 10 اکتوبر (اے پی پی) قومی اسمبلی نا اسپیکر سردار ایاز صادق پڑو کرینے کہ کانود سازی نا نظام ءِ پوسکن جوڑ کننگ نا مسخت آن ای ۔ پارلیمنٹ نا ٹہیفنگ کن ڈیجیٹائزیشن نا عمل نا بناءِ کننگانے۔ جمعہ نادے آ قومی اسمبلی نا دیوان نا بناء آ اسپیکر پارے کہ سیکرٹریٹ اٹی ڈیجیٹائزیشن نا کاریم کم و ود پورو مسنے وخت اس کہ باسک آتا آسراتی کن دا نظام زوت پارلیمنٹ لاجز اسکان ودفنگک۔ اوپارے کہ پوسکن آ نظام نا رداٹ باسک آتے دے انا ایجنڈا، آئین نا کاپی، کاروباری قاعدہ و ایلو کانود سازی نا دستاویز ات کاغدی دروشم نا جاگہ غا ڈیجیٹل وڑاٹ فراوان کننگک۔ اومستی پارے کہ گیٹ آ اسہ ہیلپ ڈیسک اس جوڑ کننگانے ہرا باسک آک تینتون ورڈآتے ترتیب تننگ کیرہ و تینا آئی پیڈز آتے دوئی کننگ کیرہ۔ اسپیکر باسک آتے پارے کہ او تینا ہموسنگت آتے ہم معلومدار کیر ہرا ایوان اٹی ساڑی افس کہ او تینا آئی پیڈز دوئی کیر۔ اوپارے کہ اسہ وار ہراتم باسک آک پوسکن آ ڈیجیٹل نظام نا کاریم اٹ اتنگ نا بناءِ کیرہ تو اوفتا ڈیسک آ کاغدی دستاویزات تخنگ نا روایت ءِ چٹفنگک۔ ایاز صادق مستی پارے کہ اگہ باسک اس تینا آئی پیڈ اتنگ ءِ گیرام کیر تو محدود کچ اٹی کاغدی کاپی یا ودکی ازباب بیک اپ نا وڑاٹ دوئی مریک۔ اوپارے کہ پوسکن آ نظام باسک آتے دے انا ایجنڈا، آئین و کاروباری قاعدہ ہرجاگہ غان ہم آسانی اٹ دوئی کننگ نا قابل جوڑ کیک، ہراڑآن اوفتا پارلیمانی کاریم زیات گچین مریک۔