وزارت داخلہ نا ملک اٹی امن و عامہ کن فیڈرل کانسٹیبلری(ایف سی)نا کاریم نا کچ ءِ ودفنگ نا فیصلہ

اسلام آباد۔ 10 اکتوبر (اے پی پی) وزارت داخلہ ملک اٹی امن وعامہ کن فیڈرل کانسٹیبلری (ایف سی) نا کاریم نا کچ ءِ ودفنگ نا فیصلہ کرینے۔ ترجمان وزارت داخلہ نا رداٹ بنجائی وزیرداخلہ محسن نقوی پشاور اٹی فیڈرل کانسٹیبلری ہیڈکوارٹر نا دورہ ءِکرے ہراڑے او فیڈرل کانسٹیبلری نا شہید آتے خراج عقیدت پیش کرے و فورس انا میوزیم اٹی ساڑی متکن آ سلہہ غاتیٹی بھاز است خواہی نا درشانی ءِ کرے۔ وزیرداخلہ محسن نقوی ناکماشی ٹی فیڈرل کانسٹیبلری ہیڈکوارٹر اٹی اسہ اہم ءُ دیوان اس مس ہراٹی امن و ایمنی نا جم حالیت آتا جاچ ءِ ہلنگا۔ دیوان اٹی فیصلہ کننگاکہ امن عامہ ءِ پک کننگ کن فیڈرل کانسٹیبلری نا کاریم نا کچ ءِ ودفنگک۔ وزیرداخلہ پارے کہ فیڈرل کانسٹیبلری ءِ ہررداٹ سوگو کننگک تانکہ او امن نا زمواری ءِ جوان وڑاٹ پورو کننگ کیر۔ اوپارے کہ ورناتے پوسکن آ خواست آتا رداٹ ٹریننگ تننگ نا فیصلہ کننگانے، وخت اس کہ اوفتے تربیت کن پیشن ناملک آہم گدریفنگک۔ محسن نقوی پارے کہ فیڈرل کانسٹیبلری ءِ پاکستان نا صف اول نا فورس جوڑ کننگ اولیت ءِ، و دا ڑکن ہرممکن وسیلہ فراوان کننگک۔ اوپارے کہ امن و ایمنی نا گچینی کن کنا پورو سپورٹ فیڈرل کانسٹیبلری تون ءِ ۔ ترجمان وزارت داخلہ نا رداٹ فیڈرل کانسٹیبلری نا بہادر گلزادہ غاک دہشت گردی نا برخلاف بے مٹ قربانی تسنو ہرافتے قوم مدام یات تخک۔