وزیراعلیٰ بلوچستان نا ڈی آئی خان اٹی دہشت گرد آتا برخلاف سرسہب کارروائی آ سیکورٹی فورس آتے خراج تحسین

کوئٹہ۔ 09 اکتوبر (اے پی پی) وزیراعلیٰ بلوچستان میر سرفراز بگٹی ڈیرہ اسماعیل خان نا علاقہ درابن اٹی فتنۃ الخوارج نا برخلاف سیکورٹی فورس آتا سرسہب کارروائی آ فورس آتے زبردست خراج تحسین پیش کرینے۔ تینا جاری کروک بیان اٹی اوآپریشن اٹی شہیدی نا جام ءِ نوش کروک آ میجر سبطین حیدر ءِ خراج عقیدت پیش کرساپارے کہ کوئٹہ غان تعلق تخوک آ دا بہادر آفیسر وطن عزیز نا دفاع ٹی جیرت و بہادری نا پوسکن ءُ درور اس قائم کرے۔ وزیراعلیٰ پارے کہ قوم ءِ تینا بہادر گلزادہ غا گمر ءِ۔ شہید اسہ بہادر باوہ نا بہادر مار ئس ہرا لمہ وطن نا رکھ اکن تینا جون ءِ ندر کرے۔ اوپارےکہ پاک فوج انا شہید آک وطن نا دفاع ٹی تینا جون تے ندر کرسا بہادری و استقامت نا پوسکن ءُ تاریخ اس نوشتہ کرینو۔ شہید آتا قربانی تے مدا م یات تخنگک و قوم اوفتا دترنا مقروض ءِ۔ وزیراعلیٰ مستی پارے کہ سیکورٹی فورس آتا سرسہب کارروائی دہشت گردی نا پورو چٹفنگ نا عزم ءِ پین سوگو کننگ ءِ۔ بلوچستان نا الس پاک فوج اتون ہم کوپہ سلوک ءُ و شہید آتا مشن ءِ سلام پیش کینہ ۔