غزہ معاہدہ نا پڑو دے ٹک نیامی ٹی دیرپاامن ءِ پک کننگ نا تاریخیءُ موقع اسے، وزیراعظم شہباز شریف

اسلام آباد۔ 09 اکتوبر (اے پی پی) وزیراعظم محمد شہباز شریف غزہ ٹی نسل کشی نا چٹفنگ کن طے مروک آ معاہدہ نا پڑو ءِ دے ٹک نیامی ٹی دیرپاامن ءِ پک کننگ نا اسہ تاریخی ءُ موقع اس گوندسا پارینے کہ پائیدار امن نا کسر ءِ آوار کننگ نا کوشست آتے نسخان تروک آ گام گیج آتے توننگے۔ پنچ شنبے نادے آ ’’ایکس‘‘ آ تینا بیان اٹی وزیراعظم امن معاہدہ نا رداٹ امریکی صدر ڈونلڈ ٹرمپ نا کڑد انا ستاءِ کرسا پارے کہ اونا کماشی، مذاکرات وگپ وتران نا دا مچ آ عمل اٹی دنیا ٹی امن کن اونا بدل مفروک عزم انا ڈیک ءِ۔ اوقطر، مصر وترکیہ نا سرکڑدہ غاتاہم ستاءِ کرے ہرافک معاہدہ طے کننگ کن بھاز کوشست کریر۔ وزیراعظم پارے کہ او فلسطینی الس ءِ خراج تحسین پیش کیک ہرافک بے پناہ مصیبت آتون مون تسنو ہرافتا ہچ ءُ حالیت اسے ٹی اعادہ ءِ بایدے کننگپ۔ اومسجد اقصیٰ ٹی ساڑی آ اشتعال انگیزی تیا گڑتی نا درشانیءِ کرسا اونا ترندی اٹ مذمت ءِ کرے۔ وزیراعظم جہانی برادری آ زور شاغا کہ او کوزہ گر و غیرکانودی آبادکارآتے اوفتا گام گیج آتیا جوابدہ گوندے و داوڑنا پین گام گیج آتے توننگے ہرا صدر ڈونلڈ ٹرمپ انا بے چیٹی ءِ کم کننگ و پائیدار امن نا کسر ءِ آوار کننگ نا کوشست آتے نسخان تننگ کیرہ۔ وزیراعظم پارے کہ او تینا شریدار، سنگت و ایلم ملک آتا سرکڑدہ غاتون اواری اٹ فلسطینی الس کن امن، سلامتی و وقار ءِ اوفتا است خواہی و اقوام متحدہ نا قرارداد آتا رداٹ پک کننگ کن کاریم ءِ برجاتخرہ۔