پاکستان ءُ بحرین ءِ پارلیمانی دوستی گروپ ءِ بنگیجی دیوان، دو نیمگی سیادی ءَ ہوار جتاجتائیں شوبگ آنی تہ ءَ کمک ءِ بابت ءَ سرجمیں گپ ءُ تران

اسلام آباد۔8اکتوبر  (اے پی پی): راجی اسمبلی ءِ باسک آسیہ ناز تنولی ءِ سروکی ءَ پاک بحرین پارلیمانی دوستی گروپ ءِ بنگیجی دیوان چار شمبے ءِ روچ ءَ برجم دارگ بوت۔ گند ءُ نند ءَ وزارت ءِ درئی کار ءُ وزارت ءِ تجارت ءِ نمائندگاں سرجمیں بریفنگ داتگ۔ گند ءُ نند ءَ وفاقی وزیر رانا مبشر اقبال، چوہدری محمد شہباز بابر، ڈاکٹر مہیش کمار ملانی، حاجی رسول بخش چانڈیو، پلین بلوچ اور  کرن عمران ڈار  ءَ بہر زرتگ ات (آن لائن شریکداری) ھوار اتنت۔  وزارت ءِ درئی کار ءُ وزارت ءِ تجارت ءِ سینئر افسر ھم ساڑی اتنت۔ ایشی ءَ ابید بحرین ءَ پاکستان ءِ سفیر ثاقب رئوف  ءَ ھم آن لائن گند ءُ نند ءَ بھر زرتگ۔ گند ءُ نند ءَ پاکستان ءُ بحرین ءِ نیام ءَ دو نیمگی سیادی ءِ استیں جاور ھال، پارلیمانی کمک، انوگیں سفارتی رابطہ ءُ گامگیج، دری پالیشی ءِ اولیت، بیپاری ءُ سرمایہ کاری ءِ موہ ءُ دیم ءَ اتکگیں چیلنج آنی سر ءَ سرجمی ءَ گپ ءُ تران کنگ بوت۔ پارلیمانی دوستی گروپ ءَ بحرین ءَ پاکستانی سفارتی مشن ءِ ازمت آناں ساڑات ءُ بحرین ءَ پارلیمانی ڈل ءِ گوستگیں تر ءُ تاب ءِ ساھت ءَ جوانیں کمک ءِ سر ءَ شگر ءُ منت گپت۔ وفاقی وزیر رانا مبشیر اقبال ءَ اے موہ ءِ سر ءَ گوشت کہ اے گل ءَ را ھاسیں رنگ ءَ کشت ءُ کشاری ءُ کاروباری شوبگ آنی تہ ءَ نوکیں سرمایہ کاری ءِ موہ آناں پجارینگ ءُ ایشی ءِ سر ءَ عمل کنگ ءِ واستہ گامگیج کنگ لوٹ ایت۔ کنوینر ایشیا ناز تنولی ءَ اے واھشت ءِ درشان کت کہ پاکستانی مشن بحرین ءِ پارلیمنٹ ءَ وتی ھمکار آنی گوما ورچوئل گند ءُ نند ءِ بندوبست بہ کنت تانکہ وت مہ وتی کمک ءَ را گیش دیمروئی بہ دنت۔ گند ءُ نند ءِ گڈ ءَ پارلیمانی دوستی گروپ ءِ باسک آں پاکستان ءُ بحرین ءِ نیام ءَ سیادی ءَ را گیش مھکم کنگ ءِ واستہ وتی جزم ءِ پدا زور دات۔ باسک آں پیسلہ کت کہ پاکستانی سفارتی مشن آناں سرجمیں کمک ءِ پجارینگ، بحرین پارلیمنٹ ءِ گوما باقاعدہ سیادی ءِ جوڑ کنگ، حکومت ءُ حکومت ءِ نیام ءَ نزیکیں سیادی ءَ را گیش کنگ ءُ مردم آنی نیام ءَ رابطہ آناں دیمروئی دیگ ءِ واستہ پارلیمانی کمک ءَ را برجا کنگ ءَ را دل یکیمی کنگ بہ بیت۔